بٷگٸن ەلوردالىق «بارىس» قۇرلىقتىق حوككەي ليگاىنداعى كەزەكتٸ ويىنىندا رەسەيدٸڭ «سالاۆات يۋلاەۆ» (ۋفا) كومانداسىن قابىلدادى, دەپ حابارلايدى "ۇلت اقپارات".
ايتا كەتۋ كەرەك, قۇرلىقتىق حوككەي ليگاسىنىڭ تۇراقتى كەزەڭٸ مەرەسٸنە جاقىنداپ كەلەدٸ. ەندٸ ەلوردالىق كلۋبتىڭ الدا ەكٸ ويىنى قالدى. سوندىقتان بٷگٸنگٸ كەزدەسۋ «بارىستىڭ» ەلورداداعى بيىلعى سوڭعى ويىنى بولماق.
«سالاۆات يۋلاەۆ» تا وسال قارسىلاس ەمەس. ۋفالىق كلۋب 59 ويىننان كەيٸن 66 ۇپاي جيناپ, قازٸر تۋرنير كەستەسٸندە ون ەكٸنشٸ ورىندا تۇر. ال «بارىس» 59 ويىننان كەيٸن 79 ۇپاي جيناپ, التىنشى ورىندا كەلەدٸ. كوماندالار پلەي-وفف كەزەڭٸنە بەرٸلەتٸن جولداماعا قول جەتكٸزٸپ ٷلگەردٸ.
بٷگٸنگٸ كەزدەسۋدە رەسەيلٸك كوماندا العاش بولىپ ەسەپ اشتى. الدىمەن ارتيوم سەرگەەۆ 6-مينۋتتا «سالاۆات يۋلاەۆتى» العا شىعاردى. بٸرٸنشٸ كەزەڭدە ۋفالىق كوماندا «بارىسقا» تارازى باسىن تەڭەستٸرۋگە ەشقانداي مٷمكٸندٸك بەرگەن جوق.
ەسەسٸنە ەكٸنشٸ كەزەڭدە قازاقستاندىق حوككەيشٸلەر قارسىلاس كوماندا قاقپاشىسىن قاپى قالدىرىپ كەتتٸ. ويىننىڭ 28-مينۋتىندا نيكيتا ميحايليس «سالاۆات يۋلاەۆ» قاقپاسىنان ساڭىلاۋ تاپتى.
ٷشٸنشٸ كەزەڭدە كيورتيس ۆالك 45-مينۋتتا «بارىس» كومانداسىن العا شىعاردى. بۇدان كەيٸن قوس كوماندانىڭ دا ەسەپتٸ ٶزگەرتەتٸن مٷمكٸندٸگٸ بولعان ەدٸ. بٷگٸنگٸ كەزدەسۋدە ەلوردالىق كلۋب قارسىلاسىنان 2:1 ەسەبٸمەن باسىم تٷستٸ.
بۇدان بۇرىن «بارىس» ەلوردادا «سيبير» كلۋبىنان وۆەرتايمدا 1:2 ەسەبٸمەن جەڭٸلٸپ قالعان ەدٸ.
«بارىس» ەندٸ سىرت ايدىندا ەكٸ ويىن ٶتكٸزەدٸ. الدىمەن 24 اقپاندا رەسەيدٸڭ «ادميرال» (ۆلاديۆوستوك), 26 اقپاندا «امۋر» (حاباروۆسك) كوماندالارىمەن كەزدەسەدٸ. سودان سوڭ قۇرلىقتىق حوككەي ليگاسى تۇراقتى كەزەڭٸ اياقتالىپ, پلەي-وفف ساتىسى باستالادى.
