«Barys» búgin qurlyqtyq hokkei ligasyndaǵy kezekti oiynyn elordada Reseidiń TsSKA (Máskeý) komandasyna qarsy ótkizdi, dep habarlaidy "Ult aqparat".
Oiyn tartysty ótti. Eki komanda da shabýylǵa kóp kóńil bóldi. Degenmen birinshi kezeńde esep ashylǵan joq.
Ekinshi kezeńde aidyn ieleri oiyn tizginin óz qolyna alýǵa tyrysty. Qarsylastar qaqpasy mańynda jii boi kórsetti. Nátijesinde 32-minýtta Nikita Mihailis TsSKA qaqpasynan sańylaý tapty.
Úshinshi kezeńde qos komanda tarapynan da gol soǵatyn birneshe múmkindik bolǵan edi. Alaida elordalyq klýb ony tiimdi paidalana alǵan joq. Máskeýlik klýb sapynan Aleksandr Popov 57-minýtta tarazy basyn teńestirip ketti. Oiyn overtmaimǵa ulasty. Overtaimda da jeńimpaz anyqtalǵan joq. Býllitte TsSKA komandasynyń joly boldy.
«Barys» biylǵy maýsymda buǵan deiin bes oiyn ótkizdi. Onyń ekeýinde jeńip, qalǵanynda qarsylasyna ese jiberdi.
Eki komanda búginge deiin 23 márte sheberlik baiqasty. Onyń 7-i «Barystyń» basym túse, qalǵanynda reseilik klýb jeńgen. Endi «Barys» elordada 18 qyrkúiekte Latviianyń «Dinamo» (Riga) klýbtarymen oinaidy. Odan keiin Reseide Cherepovets qalasynyń «Severstal» komandasymen kezdesedi.
