Búgin elordalyq «Barys» qurlyqtyq hokkei ligasyndaǵy kezekti oiynynda Reseidiń «Neftehimik» komandasymen kezdesti, dep habarlaidy "Ult aqparat".
«Neftehimik» týrnir kestesinde sońǵy oryndarda keledi. Sondyqtan búgin «Barys» jeńiske jetedi degen boljam kóp aityldy. Elordalyq klýb jankúierlerdiń sol seniminen shyǵa bildi.
Oiynnyń birinshi kezeńinde qazaqstandyq hokkeishiler basymdyq tanytty. Degenmen esep ashylǵan joq. Ekinshi kezeńniń 21-minýtynda «Barys» sapynan Darren Dits qarsylas komanda qaqpashysyn qapy qaldyrdy. Budan keiin 30-minýtta reseilik hokkeishi Arsen Hisamýtdinov tarazy basyn teńestirdi. Al 34-minýtta elordalyq Arkadii Shestakov «Barysty» taǵy da alǵa shyǵardy. Onyń komandalas áriptesi Atte Oktamaa 34-minýtta esepti ulǵaita tústi. Oiynnyń 41-minýtynda aidyn ieleri dórekilik tanytyp, olardyń qaqpasyna belgilengen býllitti «Barys» hokkeishisi Korban Nait múlt jibergen joq.
Úshinshi kezeńde de oiyn barysy alǵashqy eki kezeńdegidei órbidi. Elordalyq klýbtyń basymdyǵy aiqyn ańǵarylyp turdy. Osyndai qaǵaberis bir sátti tiimdi paidalanǵan Nikita Mihailis 50-minýtta «Neftehimik» qaqpasyna taǵy bir shaiba engizdi. Osylaisha «Barys» búgingi qarsylasyn oisyrata jeńdi.
«Barys» endi elordada 11 qańtarda Reseidiń «Avangard» (Omby) komandasymen sheberlik baiqassa, 12 qańtarda Reseidiń «Lokomotiv» (Iaroslavl), 14 qańtarda «Salavat Iýlaev» (Ýfa), 16 qańtarda «Metallýrg» (Magnitogorsk) komandalaryn qabyldaidy.
Budan buryn «Barys» 6 qańtarda «Avangard» komandasyn jeńdi.
