بٷگٸن ەلوردالىق «بارىس» قۇرلىقتىق حوككەي ليگاسىنداعى كەزەكتٸ ويىنىندا رەسەيدٸڭ «نەفتەحيميك» كومانداسىمەن كەزدەستٸ, دەپ حابارلايدى "ۇلت اقپارات".
«نەفتەحيميك» تۋرنير كەستەسٸندە سوڭعى ورىنداردا كەلەدٸ. سوندىقتان بٷگٸن «بارىس» جەڭٸسكە جەتەدٸ دەگەن بولجام كٶپ ايتىلدى. ەلوردالىق كلۋب جانكٷيەرلەردٸڭ سول سەنٸمٸنەن شىعا بٸلدٸ.
ويىننىڭ بٸرٸنشٸ كەزەڭٸندە قازاقستاندىق حوككەيشٸلەر باسىمدىق تانىتتى. دەگەنمەن ەسەپ اشىلعان جوق. ەكٸنشٸ كەزەڭنٸڭ 21-مينۋتىندا «بارىس» ساپىنان داررەن ديتس قارسىلاس كوماندا قاقپاشىسىن قاپى قالدىردى. بۇدان كەيٸن 30-مينۋتتا رەسەيلٸك حوككەيشٸ ارسەن حيسامۋتدينوۆ تارازى باسىن تەڭەستٸردٸ. ال 34-مينۋتتا ەلوردالىق اركاديي شەستاكوۆ «بارىستى» تاعى دا العا شىعاردى. ونىڭ كوماندالاس ەرٸپتەسٸ اتتە وكتاماا 34-مينۋتتا ەسەپتٸ ۇلعايتا تٷستٸ. ويىننىڭ 41-مينۋتىندا ايدىن يەلەرٸ دٶرەكٸلٸك تانىتىپ, ولاردىڭ قاقپاسىنا بەلگٸلەنگەن بۋلليتتٸ «بارىس» حوككەيشٸسٸ كوربان نايت مٷلت جٸبەرگەن جوق.
ٷشٸنشٸ كەزەڭدە دە ويىن بارىسى العاشقى ەكٸ كەزەڭدەگٸدەي ٶربٸدٸ. ەلوردالىق كلۋبتىڭ باسىمدىعى ايقىن اڭعارىلىپ تۇردى. وسىنداي قاعابەرٸس بٸر سەتتٸ تيٸمدٸ پايدالانعان نيكيتا ميحايليس 50-مينۋتتا «نەفتەحيميك» قاقپاسىنا تاعى بٸر شايبا ەنگٸزدٸ. وسىلايشا «بارىس» بٷگٸنگٸ قارسىلاسىن ويسىراتا جەڭدٸ.
«بارىس» ەندٸ ەلوردادا 11 قاڭتاردا رەسەيدٸڭ «اۆانگارد» (ومبى) كومانداسىمەن شەبەرلٸك بايقاسسا, 12 قاڭتاردا رەسەيدٸڭ «لوكوموتيۆ» (ياروسلاۆل), 14 قاڭتاردا «سالاۆات يۋلاەۆ» (ۋفا), 16 قاڭتاردا «مەتاللۋرگ» (ماگنيتوگورسك) كوماندالارىن قابىلدايدى.
بۇدان بۇرىن «بارىس» 6 قاڭتاردا «اۆانگارد» كومانداسىن جەڭدٸ.
