Sársenbiniń tańynda Korei Halyq Demokratiialyq Respýblikasy shyǵys jaǵalaýdan jaqyn qashyqtyqqa ushatyn eki ballistikalyq zymyranyn ushyrdy, dep habarlaidy «QazAqparat» Yonhap agenttigine silteme jasap.
Phenian bir aptanyń ishinde osymen ekinshi ret zymyran ushyryp otyr.
Ońtústik Koreianyń Shtab bastyqtary birlesken komiteti zymyrandardyń alǵashqysy jergilikti ýaqytpen tańǵy saǵat 5:06-da, ekinshisi 5:27-de Vonsan portyna jaqyn mańnan ushyrylǵanyn málimdedi.
Komitettiń esepteýinshe, zymyrandardyń ekeýi de 250 kilometrge, shamamen 30 km biiktikte ushqan.
Osydan alty kún buryn da KHDR dál osylai eki zymyranyn ushyrǵan. Biraq olar 50 km biiktikte 600 km ushty.
«Ballistikalyq zymyrandardyń birinen soń birin ushyrý Korei túbegindegi jaǵdaidy jaqsartýǵa baǵyttalǵan kúsh-jigerge qaishy keledi. KHDR tarapyn muny toqtatýǵa shaqyramyz», - delingen komitettiń málimdemesinde.
Komitet ókilderiniń aitýynsha, Soltústik tarapy qarýdy tekseristen ótkizip jatqan bolý kerek.
Aita keteiik, KHDR BAQ ókilderi ótken aptadaǵy zymyrandardyń ushyrylýyn Ońtústik Koreia men AQSh-tyń kelesi aida birlesken áskeri jattyǵýlar ótkizý josparyna qarsylyqtyń belgisi dep atady.
