Qazaqstan halqy Assambleiasynyń qyzmetin jetildire túsý úshin paidaly zamanaýi kontentterdi internet keńistiginde jii jariialaý kerek. Bul usynysty QR Parlamenti Májilisiniń depýtaty Iýrii Li bildirdi, dep habarlaidy QazAqparat.
«Búgingi jiynda Assambleianyń bolashaqtaǵy qyzmetine qatysty biraz dúnieler aityldy. Jeke toqtalyp ótsem, aldymen Túrkistan oblysyndaǵy kópulttylyq taqyryby ashyq aityldy. Osy turǵyda spiker Qazaqstan kópultty memleket bolǵandyqtan, kóptildilik saiasatyn ustaný kerektigin alǵa tartty jáne ol usynysty Memleket basshysyn qoldap, bilim ministrligine kóptiltilik saiasatyn zertteý týraly tapsyrma berdi. Óz basym bul usynysy tyń ózgeris dep oilaimyn. Sosyn Analar keńesiniń qyzmetin jetildirý kerektigi aityldy. Sondai-aq, internettiń paidasy men ziiany taqyryby kóterildi. Iá, internetke qatysty uzaq ýaqyt básekege túsýge bolady, óitkeni onyń paidasy men ziiany qatar júredi. Biz internettiń igiligin ǵana kórsek deimin», - dedi Iýrii Li.
Sonymen qatar, halyq qalaýlysy assambleia jumysyn jetildire túsýge qatysty óz ideiasyn ortaǵa saldy.
«Qazaqstan halqy Assambleiasy jumysyn kórsetip, qyzmetin ilgeriletý úshin internet keńestikte paidaly kontentti jii usyný kerek. Árine, ol zamanaýi ári tartymdy formatta. Sol arqyly Assambleia aýditoriiasyn keńeite alady. Sonymen qatar maǵan unaǵan jobanyń biri «Batyrlar bizdiń aramyzda». Kerek joba, sebebi óńirlerde, aýyldyq eldimekenderde eńbek etip, halyqqa paidasyn tigizip júrgen jandar barshylyq. Ony kóp adam bile bermeidi. Mysaly, aýylda sharýasyn dóńgeletip, adamdardy jumyspen qamtyp otqan jandar týraly jii aitýymyz kerek. Olardyń internetpen sharýasy joq, ony qarap otyratyn shamasy da joq. Qaidaǵy blogerlerdi nasihattaǵansha sol eńbekqor, batyrlardy elge úlgi etýimiz kerek», - deidi ol.
