قازاقستان حالقى اسسامبلەياسىنىڭ قىزمەتٸن جەتٸلدٸرە تٷسۋ ٷشٸن پايدالى زاماناۋي كونتەنتتەردٸ ينتەرنەت كەڭٸستٸگٸندە جيٸ جارييالاۋ كەرەك. بۇل ۇسىنىستى قر پارلامەنتٸ مەجٸلٸسٸنٸڭ دەپۋتاتى يۋريي لي بٸلدٸردٸ, دەپ حابارلايدى قازاقپارات.
«بٷگٸنگٸ جيىندا اسسامبلەيانىڭ بولاشاقتاعى قىزمەتٸنە قاتىستى بٸراز دٷنيەلەر ايتىلدى. جەكە توقتالىپ ٶتسەم, الدىمەن تٷركٸستان وبلىسىنداعى كٶپۇلتتىلىق تاقىرىبى اشىق ايتىلدى. وسى تۇرعىدا سپيكەر قازاقستان كٶپۇلتتى مەملەكەت بولعاندىقتان, كٶپتٸلدٸلٸك ساياساتىن ۇستانۋ كەرەكتٸگٸن العا تارتتى جەنە ول ۇسىنىستى مەملەكەت باسشىسىن قولداپ, بٸلٸم مينيسترلٸگٸنە كٶپتٸلتٸلٸك ساياساتىن زەرتتەۋ تۋرالى تاپسىرما بەردٸ. ٶز باسىم بۇل ۇسىنىسى تىڭ ٶزگەرٸس دەپ ويلايمىن. سوسىن انالار كەڭەسٸنٸڭ قىزمەتٸن جەتٸلدٸرۋ كەرەكتٸگٸ ايتىلدى. سونداي-اق, ينتەرنەتتٸڭ پايداسى مەن زييانى تاقىرىبى كٶتەرٸلدٸ. يە, ينتەرنەتكە قاتىستى ۇزاق ۋاقىت بەسەكەگە تٷسۋگە بولادى, ٶيتكەنٸ ونىڭ پايداسى مەن زييانى قاتار جٷرەدٸ. بٸز ينتەرنەتتٸڭ يگٸلٸگٸن عانا كٶرسەك دەيمٸن», - دەدٸ يۋريي لي.
سونىمەن قاتار, حالىق قالاۋلىسى اسسامبلەيا جۇمىسىن جەتٸلدٸرە تٷسۋگە قاتىستى ٶز يدەياسىن ورتاعا سالدى.
«قازاقستان حالقى اسسامبلەياسى جۇمىسىن كٶرسەتٸپ, قىزمەتٸن ٸلگەرٸلەتۋ ٷشٸن ينتەرنەت كەڭەستٸكتە پايدالى كونتەنتتٸ جيٸ ۇسىنۋ كەرەك. ەرينە, ول زاماناۋي ەرٸ تارتىمدى فورماتتا. سول ارقىلى اسسامبلەيا اۋديتوريياسىن كەڭەيتە الادى. سونىمەن قاتار ماعان ۇناعان جوبانىڭ بٸرٸ «باتىرلار بٸزدٸڭ ارامىزدا». كەرەك جوبا, سەبەبٸ ٶڭٸرلەردە, اۋىلدىق ەلدٸمەكەندەردە ەڭبەك ەتٸپ, حالىققا پايداسىن تيگٸزٸپ جٷرگەن جاندار بارشىلىق. ونى كٶپ ادام بٸلە بەرمەيدٸ. مىسالى, اۋىلدا شارۋاسىن دٶڭگەلەتٸپ, ادامداردى جۇمىسپەن قامتىپ وتقان جاندار تۋرالى جيٸ ايتۋىمىز كەرەك. ولاردىڭ ينتەرنەتپەن شارۋاسى جوق, ونى قاراپ وتىراتىن شاماسى دا جوق. قايداعى بلوگەرلەردٸ ناسيحاتتاعانشا سول ەڭبەكقور, باتىرلاردى ەلگە ٷلگٸ ەتۋٸمٸز كەرەك», - دەيدٸ ول.
