Qiyn jaǵdaiǵa tap bolǵan adamdardyń qaiǵysynan paida tabý adamgershilikke jatpaidy. Búgin ministrlik janyndaǵy jem-shóppen qamtamasyz etý jónindegi respýblikalyq jedel shtabtyń otyrysynda Aýyl sharýashylyǵy ministriniń mindetin atqarýshy Erbol Qarashókeev osylai dedi, - dep habarlaidy «Ult aqparat».
Atalǵan jiynda qurǵaqshylyqtan zardap shekken óńirlerdiń qajettilikteri eseptelgeni aityldy. Belgili bolǵanyndai, jem men kebek baǵasynyń negizsiz ósýine bailanysty jaǵdai qiyndaǵan. Osy oraida qoldanystaǵy zańnama aiasynda baǵanyń negizsiz ósý faktilerine jedel den qoiý qajet.
«Jem-shóp pen kebek satatyndar arasynda túsindirý jumystaryn júrgizýdiń mańyzdylyǵyn erekshe atap ótkim keledi jáne qurǵaqshylyq saldarynan qiyn jaǵdaiǵa tap bolǵan adamdardyń qaiǵysynan paida tabý adamgershilikke jatpaitynyn eske salamyn. Sondai-aq, bul iste deldaldardyń aralaspaýyn qadaǵalaý qajet», - dedi ministrdiń mindetin atqarýshy Erbol Qarashókeev.
Sonymen, qurǵaqshylyqtan zardap shekken oblystarǵa Úkimet rezervinen mal azyǵyn arzandatý úshin 3,6 mlrd teńge bólinse, Mańǵystaý oblysyna mal azyǵyn daiyndaý úshin 5,3 mlrd teńge bólingen. Osylaisha óńirlerdegi jem-shóp jinaýdyń qazirgi jaǵdaiy týraly Mal sharýashylyǵy ónimderin óndirý jáne qaita óńdeý departamenti direktorynyń orynbasary Q.Mutaev bylai dedi:
«Búgingi tańda shamamen on segiz mimllionǵa jýyq tonna shóp daiyndaldy, bul jospardyń 74%-yn quraidy. Qurǵaqshylyqtan zardap shekken óńirlerge kómek qolyn óńirdiń basshylyǵy men úkimet qana emes, el azamattary men qarapaiym turǵyndar da atsalysyp jatyr. Shamalarynyń kelgeninshe jep-shóp jinap, halyqtan jylý jinap, eshkim únsiz halyp jatqan joq. Osyndai qiyn sátte judyryqtai jumylyp áreket etip jatqan barlyq janǵa alǵysymyz sheksiz. El barda, halyq barda biz barmyz», - dep habarlady Q.Mutaev.
Sondai-aq, atqarylyp jatqan jumystar týraly Almaty, Qyzylorda, Mańǵystaý, Túrkistan jáne Soltústik Qazaqstan oblystarynyń shtab ókilderi habarlap, jem-shóp daiyndaý boiynsha óńirlerdegi qazirgi jaǵdai, sheshilýi qajet máseleler, sondai-aq aldyńǵy kezdesýde qoiylǵan mindetterdiń oryndalý barysy talqylandy.
Al Mańǵystaý oblysy ákiminiń orynbasary Ǵ.Niiazovtyń aitýynsha, búgingi tańda qurǵaqshylyqtan zardap shekkenderge 70 mln teńge qarjy berilgen. Tamyz aiynyń sońyna deiin Úkimet rezervinen bólingen barlyq qarjy jiberiletin bolady.
«Eldegi qurǵaqshylyq eshkimge de ońai soǵyp jatqan joq. Barlyq aimaqtardan qoldaý kórip otyrmyz. Járdem retinde júk-júk artqan úlken kólikter kelip jatyr. Biz bul úshin tek qýanyshtymyz. Bir Mańǵystaýdyń ózinde búgingi tańda qurǵaqshylyqtan zardap shekkenderge jetpis mln teńge qarjy berildi. Eń bastysy, jem-shóp qoryn qurý basty másele bolyp qala beredi. Osy boiynsha balans jasap, satýǵa arnalǵan kólemderdi aiqyndaý kerek jáne ákimdikterdiń saittaryna ornalastyrý qajet», - dedi Mańǵystaý oblysy ákiminiń orynbasary Ǵ.Niiazov.
Al ministrdiń mindetin atqarýshy Erbol Qarashókeev Mańǵystaý oblysynyń ákimdigine Qazaqstannyń barlyq azamattary men ujymdary qaiyrymdylyq jinaityn arnaiy shot ashýdy tapsyrdy. Sondai-aq, Qarashókeevtiń aitýynsha, Aýyl sharýashylyǵy ministrligi zardap shekken fermerlerge jáne Mańǵystaý oblysynyń jeke sharýa qojalyqtaryna bir kúndik jalaqysyn aýdarýǵa sheshim qabyldaǵan.
Sonymen birge, qurǵaqshylyq kezinde órtti boldyrmaýdyń nemese aldyn alýdyń máseleleri de qarastyryldy. Óitkeni, Qaraǵandy oblysy men Aqtóbe oblysynyń jaiylymdarynan da órt shyqqan bolatyn. Atalǵan jiynǵa shtab jumysyna onyń músheleri, óńir basshylarynyń orynbasarlary jáne BAQ ókilderi qatysyp, qurǵaqshylyq saldaryn joiý jáne aldaǵy qystaýǵa mal sharýashylyǵyn jem-shóppen qamtamasyz etý máselelerin sheshý boiynsha jergilikti jerlerde qabyldanyp jatqan barlyq sharalar keshenin aqparattyq qamtamasyz etý máselelerin talqylady.
Esterińizge sala keteiik, búgin ministrlik janyndaǵy jem-shóppen qamtamasyz etý jónindegi respýblikalyq jedel shtabtyń otyrysynda Aýyl sharýashylyǵy ministriniń mindetin atqarýshy Erbol Qarashókeev qiyn jaǵdaiǵa tap bolǵan adamdardyń qaiǵysynan paida tabý adamgershilikke jatpaitynyn aitqan bolatyn. Atalǵan jiynda qurǵaqshylyqtan zardap shekken óńirlerdiń qajettilikteri eseptelgeni aityldy. Belgili bolǵanyndai, jem men kebek baǵasynyń negizsiz ósýine bailanysty jaǵdai qiyndaǵan. Osy oraida qoldanystaǵy zańnama aiasynda baǵanyń negizsiz ósý faktilerine jedel den qoiý qajet.
