Foto: primeminister.kz
QR Premer-Ministri Álihan Smaiylov «24KZ» telearnasyna bergen suhbatynda 2023 jyly Qazaqstannyń agroónerkásip keshenin damytý jáne qoldaý boiynsha qandai jumystar júrgizilgeni týraly aityp berdi, dep habarlaidy "Ult aqparat" Úkimettiń baspasóz qyzmetine silteme jasap.
Osy jyl fermerler úshin ońaiǵa túsken joq. Atap aitqanda, ońtústikte vegetatsiialyq kezeńde jaýyn-shashyn az bolsa, soltústik óńirlerde egin oraǵy kezinde uzaq ýaqyt boiy jańbyr jaýdy.
«Bul ónimdiliktiń tómendeýine áser etti. Qiyn jaǵdaida memleket sharýalardy qoldaýsyz qaldyrǵan joq. Prezident tapsyrmasyna sáikes Úkimet dihandarǵa jan-jaqty kómek kórsetip jatyr», — dedi Álihan Smaiylov.
Atap aitqanda, Jambyl oblysy fermerleriniń 3 mlrd teńge shyǵyny óteldi. Sondai-aq astyqty keptirý úshin jeńildetilgen baǵamen dizel otyny bólindi. «Báiterek» holdingi tarapynan taýar óndirýshilerdiń qaryzdaryn óteý merzimi uzartyldy.
«Ósimdik jáne mal sharýashylyǵyn sýbsidiialaýǵa Úkimet rezervinen 60 mlrd teńge bólindi. Oǵan qosa jaqyn arada fermerlerdi qoldaýǵa taǵy da 30 mlrd teńge bólinetin bolady», — dedi Premer-Ministr.
Oǵan qosa elimizdiń azyq-túlik qaýipsizdigin qamtamasyz etý úshin júieli sharalar qabyldanyp jatyr.
«Biyl 65 sút fermasyn ashý úshin 100 mlrd teńge bólindi. Aldaǵy 2 jylda ishki naryqty sútpen tolyq qamtamasyz etýdi josparlap otyrmyz. Sondai-aq qus fabrikalary men saqtaý qoimalaryn salýǵa kelesi jyly taǵy 100 mlrd teńge bólinetin bolady. Bul bizge qus eti eksportyn arttyrýǵa múmkindik beredi», — dedi Álihan Smaiylov.
Úkimet basshysy aýyl sharýashylyǵy salasyna salynǵan investitsiialardyń jalpy kólemi 11 aida 855 mlrd teńgeni quraǵanyn, bul ótken jylmen salystyrǵanda 11%-ǵa artyq ekenin aitty.
«Azyq-túlik ónimderin óndirýge 130 mlrd teńge investitsiia salyndy, bul ótken jylmen salystyrǵanda 10%-ǵa kóp. Nátijesinde biyl elimizde 207 investitsiialyq joba iske qosyldy», — dedi Premer-Ministr.
Sonymen qatar Álihan Smaiylov ótken 2 jyl ishinde memleket menshigine paidalanylmai jatqan jáne zań buzýshylyqpen berilgen 10 mln ga jer qaitarylǵanyn aityp ótti. Qaitarylǵan jer birinshi kezekte dihandarǵa berilip jatyr.
