8-qabattan qulai jazdaǵan búldirshindi qutqaryp qalǵan Sábit Shontaqbaevqa ártúrli syilyq pen marapat berilýde, dep habarlaidy Ulysmedia.kz.
Birinshi bolyp búgin Tótenshe jaǵdailar ministrligi «Tótenshe jaǵdaidaǵy erligi úshin» tósbelgisimen marapattady.
Keiin qala ákimi Altai Kólginiov arnaiy qabyldap, ákimdik tarapynan birneshe kómek kórsetýge ýáde berdi.
«Óz tarapymyzdan Sábittiń otbasyna tiisti kómek kórsetemiz. Bilimi men tájiribesin eskere otyryp, Lokomotiv zaýytynyń direktorymen Sábitti jumysqa ornalastyrý týraly kelistim. Buryn ol osy sala boiynsha QTJ-da jumys istegen, mamandyǵy – vagon sharýashylyǵy. Bul salada tájiribesi bar. Sol siiaqty búkil otbasyn elordamyzǵa kóshirip ákelý týraly usynys jasadym. Sábit zaiybymen birge 4 bala (3 ul, bir qyz) ósirip otyr. Jubaiyn jumysqa turýyna, al balalaryn mektepke jáne balabaqshaǵa ornalastyrýǵa kómektesemiz. Osylaisha resmi túrde jumys istei otyryp, qyzmettik turǵyn úige úmitker bola alady, sondai-aq ózge de turǵyn úi baǵdarlamalaryna qatysa alady. Demeýshiler esebinen otbasynyń nesiesin óteýine kómektesemiz, al jazǵy ýaqytta balalaryna Býrabaiǵa joldama beremiz. Qala turǵyndaryn saqtyq sharalaryn tolyqtai saqtaýǵa, balalaryn qaraýsyz jáne úi terezesin ashyq qaldyrmaýǵa shaqyramyn», – dedi Altai Kólginov.
Sondai-aq "G-park" qurylys kompaniiasy men Ǵabit Satmaǵambetov qaiyrymdylyq qory Rio da Janeiro turǵyn úi kesheninen úsh bólmeli páter syilaý týraly sheshim qabyldapty.
Bul aqparatty qaiyrymdylyq qorynyń jetekshisi Ainur Ospan rastady.
Kópbalaly ákeniń balalarynan jyraqta - astanada qurylysta jumys istep júrgenin estigen qarapaiym halyq onyń otbasymen birge turýy úshin baspana syilaý maqsatynda aqsha jinaýdy bastap ketken edi. Dáýletten qory qazirge deiin úsh million teńgeden astam qarjy jinap úlgeripti.
