QR Ekologiia, geologiia jáne tabiǵi resýrstar ministri Serikqali Brekeshev elordadaǵy Kishi Taldykól týraly suraqtarǵa jaýap berdi, dep habarlaidy QazAqparat.
«Biz zertteý jumystaryn júrgizdik. Qazirgi ýaqytta bul kóldi tolyqtyratyn qainar kózderi joq ekenin túsinemiz. Sondyqtan da tabiǵi túrde qurǵap jatyr. Bolashaqta bul kóldi qosymsha tolyqtyryp otyrmasa, tutastai qurǵaý qaýpi bar. Biz qala ákimdigimen birneshe ret kezdesip, tikelei Taldykóldiń qasynda kóshpeli keńester ótkizdik. Tolyqtyryp otyrmasa bul kól jaqyn arada qurǵap ketetinin túsinemiz. Buǵan birneshe faktorlar, sonyń ishinde belsendi qala qurylysy da yqpal etedi», - dep jaýap berdi ministr Ortalyq kommýnikatsiialar qyzmetinde.
Degenmen, ministr atap ótkendei, Kishi Taldykól sý nysany retinde saqtalyp qalady.
«Bul kóldiń aýdany 20 gektardan kem bolmaidy. Ákimdik taǵy qosymsha zertteýler júrgizedi. Bul kóldiń eń úlken jáne tereń bóligi saqtalyp qalady. Qalǵan bóliginde – kóldiń ainalasynda rekreatsiialyq aimaq uiymdastyrylady», - dep tolyqtyrdy spiker.
Ministr ákimdik esebinen kóldiń naqty shekaralary anyqtalatynyn atap ótti.
«Kóldiń túbin tunba balshyqtardan tazartý jumystar júrgiziledi jáne qoldan sý toltyrylady. Sondyqtan, jaqyn arada Taldykól men onyń ainalasyndaǵy rekreatsiialyq aimaqtar uiymdastyrylatyn bóligi qala turǵyndary úshin óte jaqsy demalys orny bolady dep oilaimyn», - dedi Serikqali Brekeshev.
