Senat tóraǵasy Máýlen Áshimbaev Qyzylordadaǵy Kókaral sý bógetiniń jai-kúii máselesin kóterdi, dep habarlaidy QazAqparat.
Spiker osydan 5 jyl buryn bógettiń bir bóligin sý shaiyp ketkenin, sonyń saldarynan búlingen ýchaskeniń kólemi 200 metrge jetkenin aitty.
«Osydan eki apta buryn bizdiń depýtattar Aral qalasynda ózbekstandyq senatorlarmen kezdesip, Araldy qalpyna keltirý máselesin jan-jaqty talqylady. Sonda depýtattar Kókaral bógetine arnaiy baryp, onyń jaǵdaiyn óz kózderimen kórdi. Jalpy, Kókaral – Kishi araldaǵy sýdy Úlken Aralǵa jibermei saqtap turýǵa arnalǵan strategiialyq mańyzy bar nysan. Eger osy bóget shaiylyp ketse, osynsha jyl Kishi Aralǵa jinaǵan sýymyz qumǵa sińip ketedi. Oǵan qanshama qarjy bólindi, Dúniejúzilik banktiń kómegin de aldyq, Úkimet te qarjy bóldi. Sol sýǵa tutas óńirdiń halqy qarap otyr. Eger sý deńgeii tómendep ketse, úlken áleýmettik, ekonomikalyq, ekologiialyq saldary bolatyny belgili. Ashyǵyn aitsaq, úlken apat bolady. Biraq ony jóndeý jumystaryna qatysty nemqurailyq bizdi alańdatyp otyr. Sondyqtan bógetti kúrdeli jóndeý jumystaryn dereý bastaǵan jón», – dedi Máýlen Áshimbaev.
Senat tóraǵasynyń aitýynsha, qazir Qyzylorda oblysynyń ákimdigi bógetti jóndeýge qatysty qujattardy ázirlegen. Soǵan sáikes atalǵan jumysqa jalpy 5 mlrd teńgege jýyq qarajat kerek. Al jóndeý jumystaryn biyl bastaý úshin 500 mln teńge qarajat qajet.
Máýlen Áshimbaev Qarjy ministrligine jáne Ekologiia, geologiia jáne tabiǵi resýrstar ministrligine osy máselege nazar aýdaryp, biylǵa tiisti qarajatty bólý múmkindigin qarastyrý qajet ekenin jetkizdi. Al, qarajattyń negizgi bóligin kúzde 2023 jylǵy biýdjetke engizýdi usyndy.
Aita keteiik, búgin Senat otyrysynda depýtattar «Qazaqstan Respýblikasynyń Ulttyq qorynan 2022–2024 jyldarǵa arnalǵan kepildendirilgen transfert týraly» Zańyna ózgeris engizý týraly» jáne «2022–2024 jyldarǵa arnalǵan respýblikalyq biýdjet týraly» Zańyna ózgerister men tolyqtyrýlar engizý týraly» Zańdardy qarap, qabyldady.
