Foto: «Qazsýshar»
Uzyndyǵy 4 shaqyrymnan asatyn Kóshim sý kanalynyń jóndeý jumystary tolyǵymen aiaqtaldy. Sý qoimasynyń bógeti 84%-ǵa jóndeldi - shamamen 1,5 shaqyrym bóligi qaita jańartyldy. Bul týraly Sý resýrstary jáne irrigatsiia ministrligi habarlady.
— Sý jiberý kanalynyń jóndeý jumystary 69%-ǵa, al Pervomai magistraldy kanalynyń jóndeý jumystary 66%-ǵa oryndaldy. Sý qoimasyndaǵy baqylaý-ótkizý beketteri men elektrmen jabdyqtaý júiesiniń qurylysy 80%-ǵa aiaqtaldy, — delingen habarlamada.
Ministrliktiń málimetinshe, jyl sońyna deiin Kirov sý qoimasyndaǵy barlyq jóndeý jumysyn tolyq aiaqtaý josparlanǵan.
Jobanyń júzege asýy Kirov sý qoimasynyń senimdiligin arttyryp, tutynýshylarǵa sýarmaly sýdyń úzdiksiz jetkizilýin qamtamasyz etedi. Qaita jańǵyrtý jumystary nátijesinde sý qoimasynyń syiymdylyǵy ulǵaiyp, jumysy tiimdirek bolady. Bul Batys Qazaqstan oblysyndaǵy 12 myń gektardan astam jerdi sýarýǵa múmkindik beredi.
Kirov sý qoimasy 1967 jyly paidalanýǵa berilgen. Qoimanyń syiymdylyǵy — 62,9 mln tekshe metr. Bul nysan Ýral-Kóshim sýarý-sýlandyrý júiesiniń quramyna kiredi.
— Sý resýrstaryn basqarý júiesin damytý tujyrymdamasyna sáikes, ministrligimiz 37 sý qoimasyna keshendi túrde qaita jańǵyrtý jumystaryn júrgizýdi josparlap otyr. Byltyr Aqtóbe sý qoimasyna 36 jyldan keiin alǵash ret jóndeý júrgizildi. Qazirgi kezde onyń syiymdylyǵy 245 mln tekshe metr. Sondai-aq Túrkistan oblysyndaǵy Qapshaǵai sý qoimasynda jóndeý jumystary jalǵasyp jatyr», — dedi Sý resýrstary jáne irrigatsiia vitse-ministri Erbolat Ibraihanov.
Eske sala keteiik, buǵan deiin Sý resýrstary ministrligi 1,3 mln adamdy aýyz sýmen qamtý úshin 2500 shaqyrym sý qubyryn salyp jatqanyn jazǵan edik.
