Qazaqstanda tótenshe jaǵdai rejimi toqtaǵanymen, astanada buryn engizilgen karantin tártibi kúshinde qalady. Nur-Sultan qalasy ákiminiń orynbasary Baqtiiar Máken osylai dep málimdedi, dep habarlaidy "Ult aqparat".
«Osy ýaqytqa deiin elordada 97 nysan karantinge jabylǵan bolatyn. Qazirgi ýaqytta olardyń 67-nen karantin tártibi alynyp tastaldy. 30-y áli qala beredi. Búginnen bastap memlekettik bas sanitarlyq dárigerdiń qaýlysy kúshine enedi. Sondyqtan nysandardyń birazynan aldaǵy ýaqytta karantin tártibi alynyp tastalady. Alaida olardyń bárine de monitoring júrgizilip otyrady», - dedi Baqtiiar Máken OKQ-da ótken baspasóz máslihatynda.
Nur-Sultan qalasy ákiminiń orynbasary búginge deiin elordada 40 myń PTR test, 24 myń ekspres testileý júrgizilgenin málim etti. Kún saiyn qalada 3 myń test júrgiziledi. Sonymen qatar qalada aldaǵy ýaqytta kúnine 1 myń test júrgiziletin laborotoriia jasaqtalady.
«Búgingi tańda el aýmaǵynda tótenshe jaǵdai rejimi toqtatyldy. Alaida elordada koronavirýs juqtyrý qaýpi áli saqtalyp tur. Sol sebepti buryn engizilgen shekteý sharalary kúshinde qalady. Burynǵysha sporttyq, kóńil kóteretin, buqaralyq, otbasylyq sharalardy ótkizýge tyiym salynady. Oiyn-saýyq ortalyqtary, kinoteatrlar, tearlar men kórmeler, adamdar jinalatyn basqa da nysandar áli de ashylmaidy. Dini nysandardyń jumys bastaýyna da áli bolmaidy. Epidemiia azaiǵannan keiin ǵana biz bul máselelerdi qaita qaraimyz», - dedi ol.
