Ulttyq kinony qoldaý memlekettik ortalyǵy ulttyq dep tanylýǵa úmitti kinojobalardyń kezekti irikteý konkýrsyna ótinimder qabyldaýdy aiaqtady.
Qazirgi kúni Ortalyq konkýrsqa usynylǵandardy óńdeýge kirisken. Bul týraly "Ult aqparat" «Ulttyq kinony qoldaý memlekettik ortalyǵy» KEAQ baspasóz qyzmetine silteme jasap habarlaidy.
Ortalyqtaǵy Óndiris bóliminiń sarapshysy Bijan Ábishevtyń aitýynsha, biyl 450 kompaniiadan 503 ótinim kelip túsken. «Ádettegidei, «Kórkem filmder» sanatyndaǵy ótinimder sany kóp, biyl – 231. «Derekti filmder» sanatynda – 86, «Qysqametrajdy filmder» sanatynda - 73, «Birlesip shyǵarylatyn filmder» sanatynda - 58, «Animatsiia» sanatynda - 35, «Debiýt» sanatynda - 31, «Avtorlyq/arthaýstyq kino» sanatynda - 25 ótinim kelip tústi.
Naqtylap keteiik, elimizdiń eń iri kinostýdiiasy «Sháken Aimanov atyndaǵy «Qazaqfilm» AQ biyl 45 ótinim tapsyrdy. 2019 jyly ótkizilgen Kino ortalyǵynyń pitchingine 109 ótinim qabyldanǵan. 2020 jyly 226 ótinim kelip túsken. Al biyl 503 ótinim, sany jyl saiyn artýda», - deidi B. Ábishev.
Onyń sózine qaraǵanda, biyl Kino ortalyǵy ótinimder qabyldaý talaptaryn birshama jeńildetken. Oǵan sáikes, birinshi kezeńde qatysýshylar stsenariidi, avtorlardyń túiindemelerin, óndiriske suratylatyn somany qamtityn aldyn-ala qujattar paketin ǵana tapsyrýy kerek. Konkýrstyń kelesi kezeńinde prezentatsiia, smeta, niet sharttary men t.b. qujattardy qamtityn tolyq paketti daiyndaý qajet bolady.
«Qazir biz tehnikalyq jumysty aiaqtap jatyrmyz, sodan keiin stsenariilik ótinimder olardyń kórkemdik mazmuny boiynsha baǵalanady. Bul úshin Saraptama keńesi jobalardy aldyn ala baǵalaý boiynsha jumys júrgizedi. Sodan keiin pitchingke jiberiletin jobalardyń tizimin anyqtaimyz, onda konkýrsqa qatysýshylar óz jobalaryn Saraptama keńesiniń múshelerine tanystyra alady. Pitchingti ótkizgennen keiin hattamalardy óńdep, Vedomstvoaralyq komissiianyń qaraýyna ótetinderdiń tizimin jasaimyz.
Aita keteiin, jeńimpazdar Saraptama keńesiniń qorytyndysy men quramyna ministrlikterdiń basshylary, Parlament Senatynyń, Májilisiniń depýtattary kiretin Vedomstvoaralyq komissiia usynymynyń negizinde aiqyndalady. Bul komissiia óz jumysynda, eń aldymen, memlekettik múddelerdi saqtaýǵa jáne kinojobalardaǵy QR zańnamalyq normalaryn buzýshylyqtardy anyqtaýǵa baǵdarlanady», dep atap ótti Bijan Ábishev.
Eske sala ketetin jait, memlekettik qarjylandyrýdan úmitti kinojobalardy odan ári irikteý kezinde eskeriletin mańyzdy máseleler bar. Olardyń ishinde Qazaqstan Táýelsizdiginiń 30 jyldyq mereitoiyna arnalǵan filmder jasaý da bar.
«Árine, túsirilim tobynyń kásibiligi, prodiýser men rejisserdiń tájiribesine de nazar aýdarylady», deidi B. Ábishev.
