Sot Ulttyq qaýipsizdik komiteti tóraǵasynyń burynǵy birinshi orynbasary Samat Ábishtiń úkimin túsindirdi, dep habarlaidy "Ult aqparat" Stan.kz aqparat agenttigine silteme jasap.
Astananyń qylmystyq ister jónindegi aýdanaralyq soty Samat Ábishke biligin asyra paidalandy degen aiyppen úkim shyǵardy.
"Birqatar buqaralyq aqparat quraldarynda paida bolǵan jariialanymdarǵa bailanysty Astananyń qylmystyq ister jónindegi aýdanaralyq soty bilikti asyra paidalandy degen aiyp taǵylǵan Á-ge qatysty qylmystyq is (Qylmystyq kodekstiń 362-baby, 4-bóligi) qaralǵanyn habarlaidy. "Qupiia" belgisin eskere otyryp, sot otyrystary jabyq formatta ótti", – delingen habarlamada.
Sotta prokýror aiyptaýdy qoldap, sottan Samat Ábishti 10 jylǵa belgili bir laýazymdardy atqarý quqyǵynan jáne 8 jyl merzimge bas bostandyǵynan aiyrýdy surady. Bul rette qylmystyq kodekstiń 63-baby negizinde jaza probatsiialyq baqylaýdy belgilei otyryp, sol merzimge shartty túrde aiqyndalady.
"Sottalýshy kinásin tolyq moiyndady jáne óz isine ókindi. Sot úkimi boiynsha, Samat Ábish Qylmystyq kodekstiń 362-baby, 4-bóliginde kózdelgen qylmysty jasaǵany úshin kináli dep tanyldy jáne 10 jyl merzimge belgili bir laýazymdardy atqarý quqyǵynan jáne 8 jylǵa bas bostandyǵynan aiyryldy. Qylmystyq kodekstiń 63-baby negizinde taǵaiyndalǵan jazany shartty dep sanaý týraly qaýly shyǵaryldy", – dep tolyqtyrdy sot.
Buǵan deiin Ishki ister ministri Samat Ábishtiń shartty túrde sottalǵanyn rastaǵan edi.
Samat Ábish 1978 jyly 20 tamyzda Almaty oblysy Ile aýdanynda dúniege kelgen. Onyń ákesi Satybaldy Nazarbaev Qazaqstannyń tuńǵysh prezidenti Nursultan Nazarbaevtyń inisi. Onyń ótken jyly sybailas jemqorlyqqa qatysy bar degen aiyppen sottalǵan Qairat Satybaldyuly esimdi aǵasy bar. Samat Ábish óz tegin atasy Ábish Nazarbaevtyń qurmetine aldy. 2000-2006 jyldar aralyǵynda Samat Ábish UQK-de ofitser qyzmetin atqarǵan. Odan keiin tóraǵa orynbasary, Ádilet ministrligi Tirkeý qyzmeti komitetiniń tóraǵasy jáne osy departamenttiń jaýapty hatshysy bolyp qyzmet atqardy.
