Marqum Saltanat Núkenovanyń aǵasy Aitbek Amangeldi telejúrgizýshi Timýr Balymbetovke suhbat berip, anasynyń "Bishimbaev balany qaǵyp óltirdi" degen sózine qatysty pikir bildirdi, dep habarlaidy "Ult aqparat".
Aitbek Amangeldiniń aitýynsha, oǵan bul oqiǵany bir áiel betpe-bet kelip, aityp bergen.
"Jaiaý júrginshiler jolynda bala qaǵyp ketken. Biz 8-9 qarasha kúnderi Saltanattyń ólimine qatysty kýágerlerdi izdep, halyqtan kómek suradyq. Osy kezde bir áiel meni kezdesýge shaqyryp, osy oqiǵany baiandady. Qatelespesem qarasha aiynda edi, kózildirik taqqan, sharfqa oranǵan áiel boldy", – deidi Aitbek Amangeldi.
Alaida osy kezdesýden keiin ol áiel izim-ǵaiym joq boldy. Áieldiń ózin tanystyrǵan kezdegi esiminiń de jalǵan bolýy múmkin ekenin aitady.
"Men alǵashynda bul aqparatqa syni kózben qaradym. Biraq ol óte kóp aqparatpen bólisti jáne onyń bergen aqparattary resmi derektermen sáikes kelip otyrdy. Barlyǵyn naqty derektermen aty-jónderin, týǵan jyldaryn berdi. Sondai-aq ol soz kezde qylmysty óz moinyna alǵan ekinshi adamnyń aty-jónin berdi. Resmi derekterge súiensek, sol adam 3 ai ýaqytsha tergeý izoliatorynda otyrǵan. Sosyn taraptardyń tatýlasýymen is jabylyp ketken", – deidi marqumnyń aǵasy.
Aitbek kezdesken áieldiń málimetinshe, Bishimbaev mas kúiinde rólge otyryp, jaiaý júrginshiler jolaǵynda balany qaǵyp ketken. Alaida kináni janyndaǵy ekinshi adam óz moinyna alǵan.
"Osy oqiǵadan keiin qylmysty moinyna alǵan adamnyń ákesiniń kásibi keńeigen, al ózi tergeý izoliatorynan shyqqan soń áskerge baryp kelgen. Áskerden keiin ol da Báiterek kompaniiasy sekildi jerlerde laýazymdy qyzmetter atqarǵan. Al Bishimbaevtyń ózi osy oqiǵadan keiin Amerikaǵa oqýǵa ketip qalǵan", – deidi Aitbek Amangeldi.
Aitbek Amangeldi osy aqparattardy bólisken áieldiń buryn Bishimbaevtyń otbasynda jumys istegen bolýy múmkin ekenin aitady.
