QR Prezidenti Qasym-Jomart Toqaev Bala quqyqtary jónindegi ýákil Arýjan Saindy qabyldady, dep habarlaidy "Ult aqparat" Aqordanyń baspasóz qyzmetine silteme jasap.
Kezdesý barysynda Memleket basshysyna balalardyń quqyqtary men zańdy múddelerin qorǵaýǵa qatysty buǵan deiin bergen tapsyrmalarynyń nátijesinde qabyldanǵan sheshimder jaiynda egjei-tegjeili baiandaldy.
Arýjan Sain Qasym-Jomart Toqaevqa balalar arasyndaǵy múgedektik deńgeiin tómendetýge baǵyttalǵan Múmkindigi shekteýli balalardyń turmys sapasyn arttyrý jónindegi jol kartasynyń oryndalýy jaiynda málimet berdi. Onyń aitýynsha, talma, orfan jáne basqa da aýrýlarǵa shaldyqqan balalardy dári-dármekpen qamtamasyz etýge bailanysty birqatar sheshilmegen problemalar bar.
Balalar ombýdsmeni 2020 jylǵy 30 jeltoqsanda Prezident qol qoiǵan zańnyń kúshine enýine bailanysty qalyptasqan ahýal jaiynda aitty. Atalǵan zań memlekettik shyǵarmashylyq jáne sporttyq tapsyrystar týraly túsinikti zańnamalyq turǵydan bekitip, shyǵarmashylyq úiirmeler men sport sektsiialaryna qatysatyn balalardy barynsha qamtý úshin jan basyna shaqqandaǵy qarjylandyrýdy kózdeidi. Bul rette Arýjan Sain memlekettik tapsyrysty oryndaý úshin ákimdikter bólgen biýdjet qarjysynyń az ekenine alańdaýshylyq bildirdi.
Bala quqyqtary jónindegi ýákil Prezidentke densaýlyq saqtaý, áleýmettik qorǵaý jáne bilim berý júielerindegi mekemelerde, onyń ishinde, internatta, balalar úiinde jáne mamandandyrylǵan internattarda bilim alatyn balalardyń quqyqtaryn qorǵaýǵa baǵyttalǵan birqatar usynys aitty. Sondai-aq balalar quqyǵyn qorǵaýǵa bailanysty zań buzýshylyqtar anyqtalǵanyn atap ótti.
Sonymen qatar Ýákil institýtyn «Ombýdsmen týraly» Zań qabyldaý jáne memlekettegi quqyq qorǵaý tetikteriniń tiimdiligin arttyrý turǵysynan qoldaý máselesi talqylandy.
Qasym-Jomart Toqaev balalardyń quqyqtaryn qorǵaýdyń asa mańyzdy ekenin aita kele, kóterilgen másele boiynsha birqatar tapsyrma berip, muny árqashan jiti baqylaýynda ustaitynyn aitty. Prezident barlyq balanyń quqyǵyn qamtamasyz etý jónindegi memleket mindettemeleriniń sózsiz oryndalýy, balalardyń muqtajdyǵy úshin bólingen biýdjet qarjysy olardyń naqty qajettiligine jumsalýy tiis ekenin jetkizdi. Memleket basshysy balalardyń quqyǵyna qatysty zań buzýshylyqtarǵa alyp keletin kez kelgen qiianatty is-áreketterdiń joly kesilip, kináliler jazalanýy kerek dep sanaidy.
