Premer-Ministr Álihan Smaiylov 30 qarasha keshke birneshe kún buryn jylý berý júiesinde apat oryn alǵan Ekibastuz qalasyna jumys saparymen bardy, dep habarlaidy "Ult aqparat" Úkimet basshysynyń baspasóz qyzmetine silteme jasap.
Qalalyq JEO-daǵy ahýalmen, sondai-aq Pavlodar oblysy ákiminiń m. a. Á. Sqaqov pen «Pavlodarenergo» AQ bas direktorynyń m. a. V. Lesinniń baiandamalarymen tanysqan Premer-Ministr tótenshe jaǵdaidyń alǵashqy kúninen bastap arnaiy jedel shtab qurylǵanyn jáne apattyń saldaryn joiý úshin barlyq qajetti mamandar tartylǵanyn atap ótti.
«Jaǵdai dereý baqylaýǵa alyndy. Alǵashqy kúnderi apatty jerlerdi anyqtaýda qiyndyqtar boldy, biraq qazirgi ýaqytta jóndeý jumystary aiaqtalýǵa jaqyn. Búgin-erteń barlyq turǵyn úilerge jylý berý jumystary aiaqtalady dep otyrmyz», — dedi Álihan Smaiylov.
Úkimet basshysynyń aitýynsha, jylý jelileriniń ábden tozýy, jańǵyrtý úshin investitsiialardyń jetispeýi, sondai-aq jylý ortalyǵy basshylyǵynyń salǵyrttyǵy osyndai jaǵdaiǵa alyp kelgen. Aldyn ala málimetterge sáikes, jylýmen jabdyqtaý jelisine joǵary qysym berilip, sonyń kesirinen qubyrlar 15 jerde bir ýaqytta zaqymdanǵan.
Premer-Ministr qazirgi ýaqytta tiisti tergeý júrgizilip jatqanyn, onyń nátijeleri boiynsha barlyq kináli tulǵalar jaýapqa tartylatynyn aitty.
Budan basqa, JEO turaqtylyǵyn qamtamasyz etip, ony jańǵyrtýǵa jáne qalalyq jylý jelilerin jańartýǵa investitsiialar salý boiynsha jumys júrgiziletin bolady.
«JEO nemese jylý jelilerinde oqys jaǵdailar oryn alǵan Óskemen, Rýdnyi, Ridder jáne basqa qalalardyń turǵyndaryn jylýmen qamtamasyz etý máseleleri de baqylaýda», — dedi Álihan Smaiylov.
Jumys sapary aiasynda Premer-Ministr qalpyna keltirý jumystarynyń barysymen tanysty jáne jylýsyz qalǵan úilerdiń biriniń turǵyndarymen sóilesti.
Qorytyndylai kele, Úkimet basshysy ákimdikke halyqpen turaqty keri bailanys ornatyp, áleýmettik jeliler men «jedel jeli» arqyly túsetin qala turǵyndarynyń barlyq suranystaryna jedel jaýap berý qajet ekenin aitty.
