Soltústik Koreia lideri Kim Chen Yn resmi túrde elde azyq-túlik tapshylyǵy bolyp jatqanyn moiyndady. Bul týraly VVS saity habarlady, dep jazady Azattyq.
Joǵarǵy shendilerdiń jiynynda Kim "azyq-túlik tapshylyǵy boiynsha jaǵdai qiyndap barady" degen. Onyń sózinshe, byltyr bolǵan taifýnnan keiingi tasqyn saldarynan bidai mólsherden az bolyp qalǵan.
NK News saitynyń jazýynsha, keiingi ýaqytta elde azyq baǵasy kúrt ósip, bir keli banannyń quny 45 dollarǵa (shamamen 18 myń teńge) jetken. Soltústik Koreia elde resmi túrde koronavirýs tabylǵanyn moiyndamaǵanymen, virýstyń taralmaýy úshin el shekarasyn japqan. Osynyń saldarynan Qytaimen saýda-sattyq mólsheri kúrt tómendegen. Bul el Qytaidyń taýaryna, tamaǵyna táýeldi.
Budan bólek, halyqaralyq qaýymdastyq Soltústik Koreiaǵa iadrolyq baǵdarlamasy úshin sanktsiia salǵan, munyń saldary da elge teris áser etip jatyr.
Avtoritar basshy Kim Chen Yn azyq-túlik tapshylyǵy jaily osy aptada el astanasy Phenianda bastalǵan Jumysshylar partiiasynyń ortalyq komitetiniń jiynynda aitty.
Sáýirde Kim eldegi qiyn jaǵdaidy moiyndap, shendilerdi halyqtyń jaǵdaiyn jaqsartý úshin "keń kólemde" "Qiyndyq marshyn" ótkizýdi tapsyrǵan.
"Qiyndyq marshy" terminin Soltústik Koreia biligi 90 jyldary bolǵan ashtyq kezinde qoldanǵan. Sovet odaǵy qulaǵan soń bul el negizgi kómekten qaǵylyp, jappai ashtyqqa ushyraǵan edi. Asharshylyqtan qansha adam qaitys bolǵany resmi aitylmady. Biraq keibir derekterde bul ashtyqtan úsh million adam kóz jumǵany aitylady.
