Beijińde KHDR basshysy Kim Chen Yn QHR Tóraǵasy Si Tszinpinmen kezdesti, dep habarlaidy QHR-daǵy "Ult aqparat" Qytaidyń ortalyq telearnasyna silteme jasap.
KHDR kóshbasshysynyń Qytaiǵa beiresmi sapary qytailyq taraptyń shaqyrtýymen 25-28 naýryz aralyǵynda ótti. Eki memleket basshysynyń kelissózderi Búkilqytai halyq ókilderi quryltaiy ǵimaratynda ótti. Soltústik Koreia qonaǵy men onyń jubaiy Li Sol Chjýdyń qurmetine Diaoiýitai memlekettik rezidentsiiasynda banket boldy. Oǵan Si Tszinpin men onyń jubaiy Pen Liiýan, QHR Memlekettik keńesiniń premeri Li Ketsian, QHR tóraǵasynyń orynbasary Van Tsishan, basqa da sheneýnikter qatysty.
«Sapar erekshe ýaqytta ótip jatyr jáne onyń mańyzy zor. Biz bul sapardy joǵary baǵalaimyz (...) Qytai men KHDR dástúrli dostyǵynyń negizi qalandy jáne ary qarai dami bermek. Bul bizdiń birlesken teńdesi joq igiligimiz», - dedi Si Tszinpin Kim Chen Ynmen kezdesý kezinde.
Qytai kóshbasshysy ekijaqty qarym-qatynasty damytý boiynsha 4 usynysty alǵa tartty: bailanysty joǵary deńgeide jalǵastyrý, partiialar arasynda ózekti máseleler boiynsha pikir almasý, beibit damýdy, gýmanitarlyq yntymaqtastyqty, ásirese eki el jastarynyń arasynda nyǵaitý.
Kim Chen Yn óz tarapynan Qytai kóshbasshysynyń qaita sailanýymen quttyqtady.
«Qytaimen jańa jaǵdaida dostastyqty damytý - KHDR-diń strategiialyq tańdaýy jáne bul qandai jaǵdaida da ózgerissiz qalady», - dedi ol.
Eki el basshylary áleýmettik-ekonomikalyq damý, halyqaralyq jaǵdai men Koreia túbegindegi ahýal týraly pikir almasty.
«Kim Ir Sen men Kim Chen Irdiń ósietine sáikes, Koreia túbegin denýklearizatsiialaý boiynsha belsendi kúsh salamyz. Jáne bul ustanym ózgermeidi», - dep atap ótti Soltústik Koreia kóshbasshysy.
