QR Ekologiia, geologiia jáne tabiǵi resýrstar ministri Serikqali Brekeshev kiikterdi atýǵa ruqsat berilýi múmkin ekenin aitty, dep habarlaidy QazAqparat.
«Kiikterdi atýǵa ruqsat berilýi múmkin. Eger bizdiń ǵalymdar kiik sanyn retteýge ruqsat beretin bolsa, qazir jumys tobymen búkil suraqtardy qarastyryp jatyrmyz», - dedi Ekologiia ministri Májilis otyrysynan keiin tilshilerge bergen suhbatynda.
Onyń aitýynsha, biologiialyq negizdeme Qazaqstannyń barlyq aýmaǵyna - Betpaqdala, Ústirt jáne Oral popýliatsiialaryna taralady.
«Qazir negizgi másele Batys Qazaqstan oblysy boiynsha baiqalyp otyr. Óitkeni, kiikter qazir aýyl sharýashylyǵy taýaryn óndirýshilerdiń egistikterine shyǵyp jatyr. Sondyqtan munda belgili bir másele bar. Tipti másele munda ǵana emes. Ǵalymdarymyzdyń kiik sanyn retteý qajet degen usynysy bar. Bul popýliatsiianyń ózin qorǵaý úshin de qajet. Qazir baspasózdi de jiti oqyp otyrmyz. Onda bizdi Qyzyl kitapqa engen kiikterdi atýǵa ruqsat berip, ańshylyq sharýashylyqtardyń múddesin qorǵap otyr dep jatyr. Birinshiden, kiik Qyzyl kitapqa engizilmegen. Ol joiylyp bara jatqan túr retinde qarastyrylady. 2016 jyldan bastap bizde 110 myń kiik boldy. Búgingi tańda olardyń sany 1 million 318 myńǵa jetti, biz popýliatsiiany saqtap qaldyq. Qoldan kelgenniń bárin jasadyq. Endi bul popýliatsiiany retteitin ýaqyt keldi», - dedi Brekeshev.
Sonymen birge, tilshiler kiik sanyn qalai retteýge bolatynyn surady.
«Qazir bionegizdeý aiaqtalady. Odan keiin kiik sanyn retteýge naqty limit belgilenedi. Bul retteýdiń ishinde osy janýarlardy atý da bar. Qaitalap aitamyn – bul sheshim tek biologiialyq ǵylymi negizdemede qabyldanady. Limit qatań túrde anyqtalady. Qazir jumys toby quryldy, bul másele jumys tobynda qarastyrylyp jatyr. Jumys tobyna barlyq múddeli memlekettik organdardyń, Bas prokýratýranyń, IIM ókilderi kiredi. Biz brakonerlikti zańdastyrýǵa jol bermeý úshin barlyq jumysty jasap jatyrmyz. Barlyq máseleler jan-jaqty qarastyrylady. Meniń oiymsha, tekserilgen naqty sheshim bolady», - dedi Serikqali Brekeshev.
