Ýkraina astanasy Kiev qalasynda sol elde turatyn qandastardyń quryltaiy ótip jatyr, dep habarlaidy "Ult aqparat" Otandastar qorynyń baspasóz qyzmetine silteme jasap.
El Táýelsizdiginiń 30 jyldyǵyn merekeleý aiasynda Qazaqstannyń Ýkrainadaǵy Elshiligi men qazaq diasporasy birlesip uiymdastyrǵan Ýkrainada turatyn qazaqtardyń quryltaiy alǵash ret ótip otyr.
Atalǵan sharada QR Ýkrainadaǵy Elshisi Darhan Qaletaev quttyqtaý sóz sóilep, atajurttyń ystyq sálemin jetkizdi.
Sondai-aq, quryltai otyrysyna Ýkrainanyń etnosaiasi jáne ar-ojdan bostandyǵy jónindegi memlekettik qyzmet tóraǵasy Elena Bogdan, Gýmilev atyndaǵy Eýraziia ulttyq ýniversiteti rektory Erlan Sydyqov jáne Ýkraina Joǵarǵy Radasynyń halyq depýtaty, Qazaqstanmen yntymaqtastyq jónindegi parlamentaralyq toptyń múshesi, Sergei Nagorniak qatysty.
Qandastardyń basqosý jiynynyń ekinshi bóliginde Kiev qalasyndaǵy «Dostyq» Qazaq mádeni qoǵamynyń basshysy Daniiar Egamberdiev, Harkov qalasyndaǵy «Birlik» qazaqstandyq ulttyq QB basshysy Makka Qarajanova jáne qazaq diasporasynyń ókili Rústem Janǵoja shettegi qandastar atynan sóz sóilep, atajurtpen aradaǵy rýhani, mádeni, ekonomikalyq bailanystyń artýyna kúsh salatynyn atap ótti.
Tatý bereke-birlik nátijesinde halqymyz talai belesterdi baǵyndyratynyna toqtaldy.
Etnikalyq óner qairatkerleri qaýymdastyǵy basqarmasynyń prezidenti, Ýkrainanyń Ulttyq qoǵamdastyqtary Rada tóraǵasynyń orynbasary, Ýkrainanyń eńbek sińirgen ártisi Inesh Kdyrova óz sózinde ýkrain jáne qazaq halqynyń berik dostyq qarym-qatynasyna rizashylyǵyn jetkizdi.
Sonymen qatar, quryltai sońynda jańa qaýymdastyq basshysy sailanyp, osyǵan deiin atqarylǵan baǵdarlama men jobalarǵa qatysty usynys-pikirler qorytyndylanady.
Odan bólek, qoǵamdyq jumysqa belsene aralasqan qandastarymyz QR Ýkrainadaǵy Elshisi men «Otandastar qory» KEAQ alǵys hatymen marapattalady.
