Pavlodar oblysynda «Kieli Qazaqstan» ekspeditsiiasy atqa miný mádenietin jandandyrdy, – dep habarlaidy «Kazakh Tourism» ulttyq kompaniiasynyń baspasóz qyzmeti.
10-12 qańtar aralyǵynda «Kieli Qazaqstan» ekspeditsiiasy músheleri Pavlodar oblysyna jinaldy. Atalǵan ekspeditsiianyń maqsaty - jylqyny qolǵa úiretý mádenietin dáriptep, ishki týrizmdi nasihattaý. Sharaǵa tájiribeli shabandozdar, qusbegiler, trevel-blogerler men tilshiler, fotograftar jáne videooperatorlar qatysty.
Ekspeditsiianyń alǵashqy kúni qatysýshylar Sátbaev aýylynan Dalba taýynyń etegine deiin jetip, Buqar jyraý jerlengen uly abyzdyń kesenesin aralady. Ári qarai «Qanysh Sátbaev» jáne «Teńdik» kesenelerine de salt atpen bardy. Osylaisha, atqa mingen saiahattaýshylar ekspeditsiianyń alǵashqy kúni 60 shaqyrym joldy júrip ótti. Al, ekinshi kúni ekspeditsiia músheleri Q.Sátbaev aýylynda mektep oqýshylary men aýyl jastary arasynda erteden kele jatqan ulttyq at sporty oiyndaryn uiymdastyrdy. Jasóspirimder atqa minýge mashyqtanyp, asaý jylqyny júgendeý, miný, jegý tásilderin úirendi.
«Atqa miný mádenieti – qazaq halqynyń qanyna sińgen, ómirlik serigine ainalǵan úrdis. Ekspeditsiia jasóspirimder arasynda ulttyq at sportyn nasihattap, jańa týristik baǵyttardy jasaý jáne týǵan jerimizdi zertteýge yqpal etedi. Ekspeditsiia nátijesinde elimizdiń tabiǵi nysandary boiynsha jańa týristik baǵyttar, sapaly foto jáne videolar jasaqtalmaq, Sondai-aq, illiýstratsiialanǵan jolnusqa da jasalatyn bolady», - dedi At-TRAVEL klýbynyń jetekshisi Berik Aqylbekov.
Ekspeditsiia «Jabaǵy» jarysy men «Teńge alý» saiystaryna qatysyp, úzdik atanǵan jasóspirimderdi marapattaý rásimimen qorytyndylandy. Aita keteiik, «Kieli Qazaqstan» ekspeditsiiasy «Kazakh Tourism» UK men «QazaqGeography» respýblikalyq qoǵamdyq birlestiginiń uiymdastyrýymen 3-shi márte júzege asyp otyr.
Buǵan deiin saiahatshylar Aqmola, Pavlodar oblystary men Buirataý, Baianaýyl ulttyq parkterin júrip ótken bolatyn.
