Týrizm indýstriiasy komitetiniń tóraǵasy Dastan Ryspekov úsh balaly otbasynyń Nur-Sultannan Alakólge baryp demalýy Kids go free boiynsha neshe teńgege shyǵatynyn aitty, dep habarlaidy QazAqparat.
«Balalardyń ushaq biletiniń quny tek týristik pakettiń ishinde bolǵan kezde ǵana sýbsidiialanatynyn basa aitqym keledi. Iaǵni, siz týristik operatordyń qyzmetine júginbei, óz betińizben ushqan bolsańyz, bilet quny tólenbeidi. Al týristik operatordyń kómegimen demalǵan bolsańyz, únem 20-30 paiyz bolady. Mysaly, 3 balaly otbasy Nur-Sultannan Alakólge bir aptalyq demalysqa bardy deiik. Onyń shyǵyny qalypty jaǵdaida 350-400 myń teńge bolady. Osynyń ishinde shamamen 100 myń teńgeni Kids go free baǵdarlamasy boiynsha únemdeýge bolady. Sonda bir otbasy úshin aptalyq týrpakettiń quny 250 myń teńgege shyǵady degen sóz», - dedi Dastan Ryspekov.
Kazakh Tourism kompaniiasynyń basqarma tóraǵasy Erjan Erkinbaev týristik operatorlardyń kómeginsiz, óz betimen demalatyn otbasylarǵa nege mundai jeńildik usynylmaitynyn túsindirdi.
«El ishinde demalýǵa barǵan kezde týystardyń úiin panalaý tiimdi bolýy múmkin. Biraq Kids go free baǵdarlamasynyń filosofiiasy men máni tek balalarǵa tegin bilet usynýǵa arnalmaǵan. Basty maqsat – otbasylyq demalystyń tanymaldyǵyn arttyrý. Onyń ústine jaiǵasý oryndaryn, otbasymen demalýshylarǵa arnalǵan qyzmet túrlerin kóbeitýge itermeleýimiz kerek. Týristik operatorlar dál osy otbasylyq saparlarǵa kóbirek kóńil bólý úshin de osyndai tetik qajet. Baǵdarlamaǵa tek ushaq biletteriniń sýbsidiiasy kirgeniniń de sebebi bar. Qazaqstandyqtar óz balalaryna elimizdiń ózge buryshtaryn kórsetip, týristik áleýetin tanytýy kerek. Bizde landshaftyń túri kóp. 13 ulttyq park bar. Kóbimiz ózimiz turyp jatqan óńirden alysqa uzap shyqpaimyz. Bul baǵdarlama osyndai otbasylarǵa arnalǵan. Sondyqtan, meniń oiymsha Kids go free baǵdarlamasy boiynsha uiymdastyrylǵan demalysty týystarǵa qonaq bolyp barýmen salystyrýǵa kelmeitin siiaqty», - dedi Erjan Erkinbaev.
Sondai-aq, ol Kids go free baǵdarlamasymen Almatyǵa 5 kúndik demalyspen kelgen otbasynyń ortasha shyǵynyn eseptep berdi.
«Eki eresek adam, úsh balasy bar otbasy Almatyda 4 qonyp, demalýǵa kelse, eresekterdiń bilet quny 80 myń teńge bolady. Otbasylyq qonaqúi nómirine 120 myń teńge ketedi. Bul – aitarlyqtai jaqsy qonaqúidiń baǵasy. 5 kúndik atraktsiondar shyǵyny 55 myń teńgedei bolady. 5 adamnyń 4 kúngi túski asy men keshki tamaǵyna 60 myń teńge shyǵady. Sonda bárin qossaq, 315 myń teńge. Al Kids go free bolmasa, shyǵyn 415 myń bolar edi. Sonda munda da 100 myń teńge únem bar degen sóz», - ded Erjan Erkinbaev.
