Foto: RIA Novosti / Kirill Kallinikov
Shymkentte qazaqstandyqtardyń esepshotynan 65 mln teńgeden astam qarajat jymqyrǵan kiberqylmystyq top sottaldy, – dep habarlaidy "Ult aqparat" Polisia.kz saityna silteme jasap.
Tergeý amaldary internet alaiaqtardyń qurbany bolǵan qala turǵynynyń aryzynan bastaldy. Banktiń jalǵan qyzmetkerlerine sengen azamat 4 mln teńgesinen aiyrylǵan.
“Bankirler” belgisiz nómirden qońyraý shalyp, onyń qarjysyna qol suǵý yqtimaldyǵy týraly habarlap, aqshasyn saqtap qalý úshin telefon arqyly birneshe onlain operatsiialardy oryndaýyn suraǵan. Osylaisha, qala turǵyny eki nesie rásimdep, olardy “qaýipsiz” shottarǵa aýdarǵan.
"Tergeýshiler atalǵan derekti QR QK-niń 190-baby (Alaiaqtyq) boiynsha tirkedi. Izdestirý sharalaryna qalalyq politsiia departamentiniń kiberqylmyspen kúres jónindegi arnaiy toby jumyldyryldy.
Atqarylǵan birqatar jedel jumystar kúdiktilerdiń izine túsýge múmkindik berdi. Qylmysty búkil el boiynsha áreket etken alaiaq top jasaǵany belgili boldy.
Shymkenttiń 6 turǵyny jarty jylda 27 qazaqstandyqtyń 65 mln teńgeden astam qarajatyn qoldy etken. Zardap shekkenderdiń arasynda Astana, Almaty, Petropavl, Kókshetaý, Oral, Qaraǵandy jáne basqa da aimaqtardyń turǵyndary bar.
Politseiler qylmystyq toptyń 4 múshesin megapolis pen Túrkistan oblysynyń aýmaǵynda ustasa, qalǵan 2-ýi halyqaralyq izdeý nátijesinde Reseiden tabyldy" - delingen habarlamada.
Tergeý barysynda olardyń árqaisysynyń óz mindeti bolǵany anyqtalǵan. Bireýi kóshbasshy rólin atqarǵan jáne tapsyrmalar berip otyrǵan, basqalary “dropperlerdi” tapsa, al qalǵany túsken qarajatty bankomattardan sheship alýmen ainalysqan.
"Politsiia qylmystyq istiń tomdaryn barlyq dáleldermen sotqa jiberdi. Sot úkimimen alaiaqtar úsh jyldan tórt jylǵa deiin bas bostandyǵynan aiyryldy" - deidi IIM baspasóz qyzmeti ókilderi.
