Búgin Parlament qabyldaǵan kiberbýlling týraly zań boiynsha barlyq taraptyń pikiri eskerildi. Bul týraly Májilistiń jalpy otrysynan keiin tilshilerge depýtat Aidos Sarym aitty, dep habarlaidy QazAqparat.
«Birneshe ret suhbat bergenmin, oǵan kóńilim tolady. Meniń oiymsha, barlyq tarap ózin jeńimpaz dep sanai alatyn zań dep esepteýge bolady. Sebebi zań ázirlegen adamdar retinde osynsha syndy basymyzdan ótkerdik. Atap aitqanda, ony Parlamenttiń qabyldaǵanyna, Prezidenttiń qol qoiýyna jiberilgeni kóńilimizden tolyǵymen shyǵady», - dedi Sarym tilshiler saýalyna jaýap bere otyryp.
Osy oraida atalǵan qujat aiasyndaǵy sarapshylar tobyna qatysty pikir bildirdi.
«Zańdy synaǵan azamattar, zańǵa kúdik týdyrǵandar, osy qujat bizge qaýip tóndiredi degen azamattar da ózin jeńimpaz dep sanai alady. Óitkeni ýákiletti organ Aqparat ministrliginiń quqyqtary naqtylandy, shekteldi. Syn aitqandar saraptama tobynyń quramyna kirýge múddeli bolýy kerek siiaqty. Ekinshiden, bizge «balalardyń quqyǵyn jeleý etip, áleýmettik jelini buǵattap tastaǵysy keledi» degen pikir aityldy. Senatorlar qujat ishine naqty bap engizdi, iaǵni bul tek kiberbýllingke qatysty jaǵdailardy ǵana qamtyǵan», - dedi depýtat.
Sonymen qatar ol birinshi nusqada da eshqandai qaishylyq bolmaǵanyn alǵa tartty. Bul zań bastapqydan internetti buǵattaýǵa nemese bireýdiń quqyǵyn shekteýge baǵyttalmaǵan.
Aita keteiik, búgin Májilistiń jalpy otyrysynda palata depýtattary «Qazaqstan Respýblikasynyń keibir zańnamalyq aktilerine balanyń quqyqtaryn qorǵaý, bilim berý, aqparat jáne aqparattandyrý máseleleri boiynsha ózgerister men tolyqtyrýlar engizý týraly» zań jobasyna Senat engizgen ózgerispen kelisti.
Osylaisha, senatorlardyń usynysy boiynsha Aqparat jáne qoǵamdyq damý ministrligi óz qalaýy boiynsha internet-resýrstardyń, áleýmettik jeliler men messendjerlerdiń jumysyn shekteýge nemese toqtatýǵa múmkindigi bolmaidy. Tek balaǵa qatysty kiberbýlling dep tanylǵan aqparatty ǵana joiýǵa bolady.
Balalarǵa qatysty kiberbýlling qandai bolmaq, ózgesi qandai bolady, senatorlar ony memlekettik organǵa emes, arnaiy qurylǵan sarapshylar tobyna sheshýdi usyndy.
