Halyqaralyq valiýta qory (HVQ) keńesi COVID-19 pandemiiasymen kúres úshin Qyrǵyzstan úkimetine 120,9 mln dollar qarjylai kómek berýdi maquldady. Qordyń retteýshi direktory Kristalina Georgievanyń aitýynsha, COVID-19 indeti "Qyrǵyzstan ekonomikasyna aýyr soqqy bolǵan jáne qarjyǵa táýeldiligin arttyrǵan".
Georgievanyń aitýynsha, bul kómek koronavirýspen kúreske jumsalatyn shyǵyndy jabýǵa kómektesedi, densaýlyq salasyna bólingen qarjyny óz maqsatynda paidalanýǵa múmkindik beredi.
Osy apta basynda HVQ epidemiia bastalǵan ýaqyttan beri uiymnyń alǵashqy kómegin Qyrǵyzstan alýy múmkin dep topshylaǵan. Ortalyq Aziia jáne Taiaý Shyǵys elderi HVQ-dan qarjylyq kómek suraǵan. Uiymnyń aitýynsha, bul ótinishterge múmkindiginshe jyldam jaýap beriledi
Sońǵy málimetter Qyrǵyzstanda 44 adamnan koronavirýs tabylǵanyn kórsetip otyr. Sarapshylar test jetispegendikten koronavirýs juqqan adamdardyń naqty sanyn anyqtaý qiyn deidi.
