2020 jylǵy 3 qyrkúiekte Niý-Iorktiń ońtústik okrýgi boiynsha AQSh Okrýgtik soty Ilias pen Viktor Hrapýnovtarǵa qarsy sot óndirisiniń tártibin buzǵany úshin aiyppul salý týraly kezekti qaýly shyǵardy.
Bul týraly QR Ádilet ministrliginiń resmi saity habarlady.
Sýdia Ketrin Parker Hrapýnovtar kóptegen zańdy mindettemelerdi buzǵan, dálelderdi ádeii joiǵan jáne keibir dálelderdiń óz qoldarynda joqtyǵy týraly jalǵan jaýap bergen degen qorytyndyǵa keldi.
Sondai-aq sot Hrapýnovtardyń osy is boiynsha keibir sot qaýlylaryn, sonyń ishinde Ilias Hrapýnovtyń qupiia aiǵaqtardy ruqsatsyz taratýǵa salynǵan tyiymdy buzǵandyǵyn anyqtady.
Aǵymdaǵy jylǵy 3 qyrkúiektegi sheshim sottardyń Hrapýnovtar men Ábiliazovqa qatysty quqyqqa qaishy minez-qulqy jáne sot óndirisiniń tártibin buzǵany úshin aiyppuldar taǵaiyndaý týraly ústimizdegi jylǵy mamyr aiynda jáne 2019 jylǵy shilde aiynda shyǵarylǵan qaýlylarynyń jalǵasy bolyp tabylady. Bul qatarynan sanaǵanda besinshi sheshim.
Aiyppuldyń naqty mólsheri Talapkerlerdiń ózderi jumsaǵan sot shyǵyndarynyń somasyn sotqa usynǵannan keiin belgilenedi.
Qazaqstan Respýblikasy Ádilet ministrligi (Almaty q. ákimdiginiń atynan) «BTA Bank» AQ-men (budan ári - Talapkerler) birlesip, tórt jyldan astam ýaqyt buryn Ábiliazovty, Hrapýnovtardy jáne olardyń qylmystyq sybailastaryn QR-dan urlanǵan aqshany AQSh-ta jylystatty degen aiyppen Niý-Iorktaǵy «Flatotel» sot qaraýyna bastamashylyq jasaǵan.
Ábiliazov jalǵan nesieler berý arqyly BTA-dan milliardtaǵan dollar urlaǵan. Ol úshin Ábiliazov Qazaqstanda sottalyp, Birikken Koroldik sottarynda kináli dep tanylǵan. AQSh-taǵy sot qaraýlary barysynda Talapkerler Ábiliazovtyń qylmystaryn rastaityn qosymsha eleýli dálelderdi jinady, sondai-aq osy qylmystardyń jasalýyn óz kózimen kórgen kóptegen kýálardyń jaýaptaryn qamtamasyz etti.
QR Úkimetiniń Konsýltanty – «Boies Schiller Flexner LLP» Seriktesi Mettiý Shvarts: «Talapkerler usynylyp jatqan dálelderge sottyń muqiiat qaraýyn joǵary baǵalaidy. Ábiliazov, Hrapýnovtar jáne olardyń sybailastary sot protsesinde adal nietpen qatysýdan birneshe ret bas tartyp, kóptegen sot qaýlylarynyń talaptaryn buzǵan. Dálelderdiń bir bóligin qasaqana joiǵandyqtaryna qaramastan, olardyń jasalǵan qylmystarǵa qatystylyǵyn rastaityn qujattar jetkilikti. Talapkerler sol dálelderdi Niý-Iork alqabiler sotynyń nazaryna usyný múmkindigin asyǵa kútýde», dep málimdedi.
