Elimizde ústinen basyp otyryp oinaityn "Homiak/Qoian" oiyny jurtshylyq arasynda taralýda. Sol arqyly baiýǵa bolady degenge sengen adamdar oǵan ýaqytynyń kóp bóligin jumsaidy eken. Mamandar oiyn qosymshalarynda naqty aqsha tabýǵa bola ma, joq pa, degen saýalǵa jaýap berip, onyń ziianyn atady.
31 arnanyń “Informbiýro” jańalyqtar baǵdarlamasynyń habarlaýynsha, messendjerdegi oiyn tek qazaqstandyqtar arasynda emes, jer sharyndaǵy milliondaǵan adamdardyń nazaryn aýdarýda. Oiynnyń siýjeti boiynsha janýardyń boialǵan jerin basý arqyly virtýaldy monetalar alýǵa bolady. Ázirleýshiler olardy naqty kriptovaliýtaǵa aiyrbastaýǵa bolady dep sendirýde. Biraq sarapshylar munyń ekitalai ekenin jetkizdi. Sebebi ol úshin joba naqty kripto birjasynda tirkelýi kerek. Alaida ol áli tirkelmegen.
Mamandar oiyn oinar aldynda báribir de jurtshylyqtyń qarajat tóleitinin jáne munyń psihologiialyq turǵyda adam sanasyna keri áserin jetkizdi.
"Qoiandy urý úshin sizden aqsha alady. Bul alaiaqtyqtyń klassikalyq mysaly. Sondyqtan sizge eshqandai qarajat tóleýdiń qajeti joq", – dedi kiberqaýipsizdik, IT jáne kommýnikatsiia salasyndaǵy táýelsiz sarapshy Evgenii Pitolin.
Psihologtar mundai oiyndar túrli máseleler týyndatýy múmkin ekenin jetkizdi.
"Bul ádet qumar oiyndarǵa, liýdomaniiaǵa ákelýi múmkin. 21 kún oinasa ol ádetke ainaldy degen sóz. Sonymen qatar, únemi oinap túrli deńgeilerge jetýge umtylys, syiaqy alý qajettiligine bailanysty stress pen mazasyzdyq deńgeiiniń joǵarylaýyna ákelýi múmkin",- dedi Qostanai oblysy bilim basqarmasynyń Aimaqtyq psihologiialyq qoldaý jáne qosymsha bilim berý ortalyǵynyń direktory Elena Petrenko.
Sarapshylar paidany ázirge tek oiyndy jarnamalaityn blogerler ǵana taba alatynyn alǵa tartty.
