Elordada shaibaly hokkeiden QR Prezidenti kýbogynyń ekinshi oiyn kúni aiaqtaldy, dep habarlaidy "Ult aqparat".
Elordalyq «Barys» ekinshi oiynyn Qytaidyń «Kýnlýn Red Star» komandasyna qarsy ótkizdi. Oiyn barysynda qazaqstandyq klýbtyń basymdyǵy baiqalyp turdy.
Birinshi kezeńniń 5-minýtynda elordalyq klýbtan Mett Frettin esep ashty. Odan keiin Kirill Savitskii 32, Kodi Kýnik 33, Nikita Mihailis 34-minýtta «Barystyń» basymdyǵyn arttyra tústi.
Al «Kýnlýn Red Star» oiynshylary Parker Fý 39, Greg Skvairz 54-minýttarda gol soǵyp, esep aiyrmasyn qysqartqan edi.
Oiynnyń 56-minýtynda Roman Starchenko qorytyndy esepti belgiledi.
Nátijesinde «Barys» qarsylasynan 6:2 esebimen basym tústi.
Sondai-aq, búgin Qaraǵandynyń «Saryarqasy» Óskemenniń «Torpedosyn» 2:1 esebimen jeńdi.
Alǵashqy týrda «Barys» «Saryarqaǵa», «Torpedo» «Kýnlýn Red Starǵa» 3:4 esebimen ese jibergen edi.
Aita keteiik, atalǵan týrnir 15 tamyzda máresine jetedi. Endi 14 tamyzda «Barys» pen «Torpedo», «Saryarqa» men «Kýnlýn Red Star» komandalary sheberlik baiqasady.
Komandalar irikteý satysynda bir-bir oiynnan ótkizedi. Odan keiin alǵashqy eki oryndaǵy ujymdar jarystyń finaldyq satysyna shyqsa, qalǵan ekeýi úshinshi oryn úshin saiysqa túsedi.
