«Barys» hokkei klýby shabýylshy Roman Starchenkomen kelisimshartty uzartty, dep habarlaidy "Ult aqparat".
«Barys» hokkei klýby málim etkenindei, birjaqty kelisim 2 jylǵa jasalǵan.
R.Starchenko – Qurlyqtyq hokkei ligasy (QHL) qurylǵannan beri «Barys» sapynda óner kórsetip kele jatqan birden-bir oiynshy.
Ótken maýsymda plei-ofty qosqanda, 33 jastaǵy shabýylshy 58 match ótkizip, 35 (18+17) upai jinady. QHL-da onyń esebinde 634 oiynda barlyǵy 318 (176+142) upai bar.
QHL-daǵy «Barys» tarihyndaǵy mergender kóshinde R.Starchenko Naidjel Doýs (217) pen Brendon Bochenskiiden (179) keiin úzdik úshtikti túiindep tur. Onyń jańa maýsymda-aq B.Bochenskiidi basyp ozatyndai múmkindigi bar.
R.Starchenkonyń Qazaqstan ulttyq quramasynyń bedeldi oiynshylarynyń biri ekendigi belgili. Jýyrda Halyqaralyq hokkei federatsiiasy Qazaqstannyń álem chempionattarynyń elitalyq divizionyndaǵy kórsetkishterin saralai otyryp, eń úzdik quramdy jariia etti. Buǵan qaqpashy Vitalii Eremeev, qorǵaýshylar Evgenii Paladev pen Aleksei Troshinskii, shabýylshylar Talǵat Jailaýov, Nikolai Antropov jáne Evgenii Koreshkov kirdi. Federatsiia sonymen qatar qaqpashy Vitalii Kolesnik, qorǵaýshy Kevin Dallmen, shabýylshylar Erlan Saǵymbaev pen Roman Starchenkonyń da esimderin atap ótti.
«Barys» klýby munyń aldynda Anton Nekriach, Arkadii Shestakov, Ivan Vereshagin syndy oiynshylarmen kelisimshartty uzartqan bolatyn.
1 mamyr kúni QHL-da transferlik tereze ashylyp, «Barystan» birneshe beldi hokkeishiniń ketkeni belgili boldy. Atap aitqanda, qaqpashy Eddi Paskýale men qorǵaýshy, álem chempiony Atte Ohtamaa «Lokomotiv» (Iaroslavl) klýbynyń qataryn tolyqtyrsa, shabýylshy Korben Nait ombylyq «Avangardqa» ketti.
Biyl «Barystan» qol úzgen Belarýs mamany Andrei Skabelkanyń osy «Lokomotivtiń» tizginin ustaityny aitylýda. Sondyqtan elordalyq klýbqa jańa bas bapker men tyńnan basqa da oiynshylardyń keletini anyq.
Eske sala keteiik, budan buryn Andrei Skabelkanyń «Barystyń» bas bapkeri qyzmetinen ketkenin jazǵan bolatynbyz.
