Qurlyqtyq hokkei ligasy aiasynda elordalyq «Barys» búgin, 5 aqpanda Reseide «Cibir» (Novosibir) komandasymen kezdesti, dep habarlaidy QazAqparat tilshisi.
Plei-off kezeńi jaqyndap keledi. Komandalar oǵan shyǵýǵa kúsh salyp otyr. «Barys» ta biyl solardyń qataryna qosylýǵa niet tanytyp júrgen jaiy bar. Elordalyq klýb sońǵy bes kezdesýdiń tórteýinde jeńilip qaldy. Bul týrnir kestesinde joǵary orynǵa kóterilýge edáýir kedergisin keltiretini anyq.
Sondyqtan «Barys» búgingi kezdesýde jinaqy oiyn kórsetýge tyrysty. Alaida, alǵashqy eki shaibany aidyn ieleri soǵyp ketti. «Cibir» sapynan Iýrki Iokipakka 14, Viktor Komarov 23-minýttarda mergendigimen kózge tústi.
Oǵan «Barys» sapynan Maksim Mýsorov 24, Kirill Paniýkov 46-minýttarda qos golmen jaýap qaiyrdy. Osylaisha tarazy basy teńesti. Al 48-minýtta Djessi Bleker elordalyq klýbty alǵa shyǵardy.
Osylaisha «Barys» qarsylasynan 3:2 esebimen basym tústi. Qazaqstandyq klýb plei-off kezeńine joldama aldy.
Endi «Barys» 7 aqpanda Reseide «Metallýrg» (Magnitogorsk) komandasymen kezdesedi. Qazaqstandyq komanda atalǵan qarsylasynan 3 aqpanda 1:3 esebimen jeńilip qalǵan edi.
