Qurlyqtyq hokkei ligasy aiasynda elordalyq «Barys» 21 qańtar kúni cyrt aidynda Reseidiń «Dinamo» (Máskeý) komandasymen kezdesti, dep habarlaidy "Ult aqparat".
Týrnirdiń plei-off kezeńi jaqyndap keledi. Komandalar jaǵdaiyn jaqsartýǵa kúsh sala bastady. Sondyqtan búgingi kezdesýdiń tartysty ótetini anyq bolatyn.
Aita keterligi, eki komanda arasyndaǵy sońǵy tórt oiynda «Barys» qarsylasyna ese jiberip júrgen edi. Sońǵy márte máskeýlik klýbty 2018 jyldyń 24 qyrkúieginde overtaimda 3:2 esebimen tize búktirdi.
Búgingi kezdesý barysynda qos komanda jii shabýylǵa shyǵyp jatty. Birinshi kezeńniń 15-minýtynda elordalyq hokkeishi Djessi Bleker mergendik tanytty. Al 18-minýtta «Barystyń» taǵy bir oiynshysy Pavel Akolzin esepti ústemelei tústi.
Budan keiingi kezeńderde tablodaǵy esep ózgergen joq. Oiynda «Barys» 2:0 esebimen basym boldy. Osylaisha komanda jeńis seriiasyn úsh oiynǵa jalǵastyrdy.
Atalǵan jeńisten keiin elordalyq klýb týrnir kestesinde 55 upaimen 12-orynǵa kóterildi.
Esterińizge sala ketelik, budan buryn «Barys» syrt aidynda «Iokerit» komandasyn utqan bolatyn.
Endi «Barys» syrt aidynda 23 qańtarda Reseidiń «Vitiaz» (Podolsk) komandasymen kezdesedi. Al 26 qańtarda elordada Reseidiń «Traktor» (Cheliabinsk) klýbyn qabyldaidy.
