قۇرلىقتىق حوككەي ليگاسى اياسىندا ەلوردالىق «بارىس» 21 قاڭتار كٷنٸ cىرت ايدىندا رەسەيدٸڭ «دينامو» (مەسكەۋ) كومانداسىمەن كەزدەستٸ, دەپ حابارلايدى "ۇلت اقپارات".
تۋرنيردٸڭ پلەي-وفف كەزەڭٸ جاقىنداپ كەلەدٸ. كوماندالار جاعدايىن جاقسارتۋعا كٷش سالا باستادى. سوندىقتان بٷگٸنگٸ كەزدەسۋدٸڭ تارتىستى ٶتەتٸنٸ انىق بولاتىن.
ايتا كەتەرلٸگٸ, ەكٸ كوماندا اراسىنداعى سوڭعى تٶرت ويىندا «بارىس» قارسىلاسىنا ەسە جٸبەرٸپ جٷرگەن ەدٸ. سوڭعى مەرتە مەسكەۋلٸك كلۋبتى 2018 جىلدىڭ 24 قىركٷيەگٸندە وۆەرتايمدا 3:2 ەسەبٸمەن تٸزە بٷكتٸردٸ.
بٷگٸنگٸ كەزدەسۋ بارىسىندا قوس كوماندا جيٸ شابۋىلعا شىعىپ جاتتى. بٸرٸنشٸ كەزەڭنٸڭ 15-مينۋتىندا ەلوردالىق حوككەيشٸ دجەسسي بلەكەر مەرگەندٸك تانىتتى. ال 18-مينۋتتا «بارىستىڭ» تاعى بٸر ويىنشىسى پاۆەل اكولزين ەسەپتٸ ٷستەمەلەي تٷستٸ.
بۇدان كەيٸنگٸ كەزەڭدەردە تابلوداعى ەسەپ ٶزگەرگەن جوق. ويىندا «بارىس» 2:0 ەسەبٸمەن باسىم بولدى. وسىلايشا كوماندا جەڭٸس سەريياسىن ٷش ويىنعا جالعاستىردى.
اتالعان جەڭٸستەن كەيٸن ەلوردالىق كلۋب تۋرنير كەستەسٸندە 55 ۇپايمەن 12-ورىنعا كٶتەرٸلدٸ.
ەستەرٸڭٸزگە سالا كەتەلٸك, بۇدان بۇرىن «بارىس» سىرت ايدىندا «يوكەريت» كومانداسىن ۇتقان بولاتىن.
ەندٸ «بارىس» سىرت ايدىندا 23 قاڭتاردا رەسەيدٸڭ «ۆيتياز» (پودولسك) كومانداسىمەن كەزدەسەدٸ. ال 26 قاڭتاردا ەلوردادا رەسەيدٸڭ «تراكتور» (چەليابينسك) كلۋبىن قابىلدايدى.
