Qurlyqtyq hokkei ligasy aiasynda elordalyq «Barys» búgin Qytaidyń «Kýnlýn Red Star» komandasymen syrt aidynda kezdesti, dep habarlaidy "Ult aqparat".
Týrnir kestesinde qytailyq klýb tómengi oryndarda keledi. Sondyqtan olar úshin árbir upaidyń mańyzy artyp tur. Búgingi oiynda atalǵan komanda jeńiske jetýge kúsh salatyny anyq edi.
Oiynnyń birinshi kezeńinde elordalyq hokkeishiler tizgindi qolyna alýǵa tyrysty. Dese de «Kýnlýn Red Star» klýby alǵashqy shaibany soǵyp ketti. Oiynnyń 17-minýtynda Hanter Shinkarýk mergendik tanytty.
Budan keiin «Barys» birneshe qolaily sátti múlt jiberip aldy. Ekinshi kezeńde tablodaǵy esep ózgergen joq.
Úshinshi kezeńde elordalyq klýb kóptegen shabýyldar uiymdastyrdy. Nátijesinde 52-minýtta «Barystyń» jas hokkeishisi Samat Daniiar biylǵy maýsymdaǵy alǵashqy shaibasyn soqty.
Negizgi kezeńde 1:1 esebi tirkeldi. Oiyn overtaimǵa ulasty. Overtaimda Darren Dits jeńis shaibasyn soqty. Osylaisha elordalyq klýb atalǵan qarsylasyn biylǵy maýsymda úshinshi márte tize búktirdi.
Endi «Barys» 21 jeltoqsanda Reseide «Torpedo» (Nijnii Novgorod) komandasymen kezdesedi.
