قۇرلىقتىق حوككەي ليگاسى اياسىندا ەلوردالىق «بارىس» بٷگٸن قىتايدىڭ «كۋنلۋن رەد ستار» كومانداسىمەن سىرت ايدىندا كەزدەستٸ, دەپ حابارلايدى "ۇلت اقپارات".
تۋرنير كەستەسٸندە قىتايلىق كلۋب تٶمەنگٸ ورىنداردا كەلەدٸ. سوندىقتان ولار ٷشٸن ەربٸر ۇپايدىڭ ماڭىزى ارتىپ تۇر. بٷگٸنگٸ ويىندا اتالعان كوماندا جەڭٸسكە جەتۋگە كٷش سالاتىنى انىق ەدٸ.
ويىننىڭ بٸرٸنشٸ كەزەڭٸندە ەلوردالىق حوككەيشٸلەر تٸزگٸندٸ قولىنا الۋعا تىرىستى. دەسە دە «كۋنلۋن رەد ستار» كلۋبى العاشقى شايبانى سوعىپ كەتتٸ. ويىننىڭ 17-مينۋتىندا حانتەر شينكارۋك مەرگەندٸك تانىتتى.
بۇدان كەيٸن «بارىس» بٸرنەشە قولايلى سەتتٸ مٷلت جٸبەرٸپ الدى. ەكٸنشٸ كەزەڭدە تابلوداعى ەسەپ ٶزگەرگەن جوق.
ٷشٸنشٸ كەزەڭدە ەلوردالىق كلۋب كٶپتەگەن شابۋىلدار ۇيىمداستىردى. نەتيجەسٸندە 52-مينۋتتا «بارىستىڭ» جاس حوككەيشٸسٸ سامات دانييار بيىلعى ماۋسىمداعى العاشقى شايباسىن سوقتى.
نەگٸزگٸ كەزەڭدە 1:1 ەسەبٸ تٸركەلدٸ. ويىن وۆەرتايمعا ۇلاستى. وۆەرتايمدا داررەن ديتس جەڭٸس شايباسىن سوقتى. وسىلايشا ەلوردالىق كلۋب اتالعان قارسىلاسىن بيىلعى ماۋسىمدا ٷشٸنشٸ مەرتە تٸزە بٷكتٸردٸ.
ەندٸ «بارىس» 21 جەلتوقساندا رەسەيدە «تورپەدو» (نيجنيي نوۆگورود) كومانداسىمەن كەزدەسەدٸ.
