Jaz mezgilinde Qazaqstannyń HQO-larynda jeke kýálik pen tólqujatty resimdeý úshin ótinish bildiretin klientter sany artady, dep habarlaidy QazAqparat.
Azamattarǵa arnalǵan úkimet korporatsiiasynyń málimetinshe, 2022 jyldyń alty aiynda qazaqstandyqtarǵa 1 353 590 jeke kýálik pen pasport berildi. Rásimdelgen qujattardyń eń kóbi maýsym aiynda tirkelgen, sany – 266 668.
«Osy rette HQO-da tólqujat pen jeke kýálikti yńǵaily ári jyldam jolmen qalai alýǵa bolatynyn aitqymyz keledi. Pasport pen jeke kýálikti alý qyzmeti áli onlain rejiminde qoljetimdi bolmai tur. Bul qujattardy rásimdeý úshin mindetti túrde HQO-ǵa júginý qajet. Dese de, qyzmet eksaýmaqtylyq qaǵidaty boiynsha kórsetiledi – ózińizdiń tirkelgen mekenjaiyńyzǵa qaramastan, kez kelgen HQO-ǵa bara alasyz», - dep jazdy vedomstvodan.
HQO-larda jeke kýálik pen pasportty resimdeý boiynsha operatsiiany kóshi-qon qyzmeti kórsetedi. Eger tólqujat alý úshin birinshi ret kelip tursańyz, sizge tek jeke kýálik qajet bolady. Eger sizdiń tólqujatyńyzdyń merzimi aiaqtalsa, ony merzimi aiaqtalǵanǵa deiin 1-2 ai buryn aýystyra alasyz. Tólqujattyń merzimi aiaqtalǵannan keiin jańa tólqujat alý úshin ótinish bildirseńiz, keshiktirgenińiz úshin aiyppul qarastyrylmaidy.
«Tólqujat úshin memlekettik baj – 8 AEK (2022 jyldyń 1 qańtarynda belgilengen AEK) nemese 24 504 teńge. Qyzmet kórsetýdiń standartty merzimi – 15 jumys kúni. Alaida, qosymsha tólem jasaý arqyly bul protsesti jedeldetýge bolady. Nur-Sultan, Almaty, Shymkent jáne Aqtóbe turǵyndary protsesti osy ádis boiynsha úsh kúnnen bir jumys kúnine deiin qysqarta alady:
1 jedeldilik sanaty – 1 jumys kúnine deiin - 4 983 teńge;
2 jedeldilik sanaty – 3 jumys kúnine deiin - 2 752 teńge.
Oblys ortalyqtary úshin basqa ádis qarastyrylǵan:
1 jedeldilik sanaty – 3 jumys kúnine deiin - 4 983 teńge;
2 jedeldilik sanaty – 5 jumys kúnine deiin - 2 752 teńge», - delingen habarlamada.
Al aýdandar men oblystardaǵy qalalar úshin tek úshinshi sanat qoljetimdi: 1 116 teńge qosymsha tólem arqyly 7 jumys kúnine deiin jedeldete alady.
Balanyń tólqujatyn rásimdeý kezinde onyń týý týraly kýáligin usynyp, baj salyǵyn tóleý qajet. Qyzmetke ótinish bildirý úshin balanyń ata-anasynyń biri kelýi mindetti.
«QR azamattary jeke kýálikti 16 jasqa tolǵan kezde alady. Osy jasqa jetken kezde qujatty bir ai ishinde rásimdeý kerek, áitpese 7 AEK nemese 21 441 teńge aiyppul tóleý kerek bolady. Sonymen qatar, eger merzimi aiaqtalǵan jeke kýálik bir ai ishinde jańartylmasa, dál osy mólsherdegi aiyppul qarastyrylǵan. Eger aiyppuldy bir apta ishinde tóleitin bolsańyz, onda somma 50 paiyzǵa tómendeidi. Eger sizde pasport bar bolsa, jeke kýálikti rásimdeý úshin ony da ózińizben birge alyp kelý kerek. Bul rette jeke kýálik úshin memlekettik baj 0,2 AEK nemese 613 teńge bolady», - dep jazdy Azamattarǵa arnalǵan úkimetten.
Qyzmetti tólqujatpen birdei ádis boiynsha jedeldetýge bolady. Sonymen qatar, jeke kýálik pen tólqujat úshin memlekettik baj salyǵyn tóleýden bosatylǵan klientterdiń jeńildetilgen sanaty bar ekenin eskertemiz. Olar:
• UOS ardagerleri jáne olarǵa teńestirilgen tulǵalar;
• Keńes odaǵynyń batyrlary jáne Sotsialistik eńbek erleri;
• barlyq toptaǵy múgedekter, sondai-aq bala kezinen múgedek bolǵan klienttiń ata-anasynyń biri;
• qarttar men múgedekterge arnalǵan mekemelerde turatyn egde jastaǵy adamdar;
• jetim balalar jáne balalar úilerinde nemese internattarda turatyn ata-anasynyń qamqorlyǵynsyz qalǵan balalar;
• «Batyr Ana» ataǵy bar, «Altyn alqa» jáne «Kúmis alqa» tósbelgilerimen nagradtalǵan kópbalaly analar;
• Chernobyl apatynyń saldarynan zardap shekken azamattar.
