Elimizdiń birneshe qalasyndaǵy Halyqqa qyzmet kórsetý ortalyqtarynda qandastarǵa qyzmet kórsetetin bólimder ashylyp jatyr, dep habarlaidy "Ult aqparat" ministr Baǵdat Mýsinniń jelidegi paraqshasyna silteme jasap.
"Búgin Astanadaǵy Halyqqa qyzmet kórsetý ortalyqtarynyń birine baryp, otanymyzǵa oralǵan qandastarymyz úshin jasalǵan qyzmet kórsetý bólmesiniń qalai jumys isteitinin kórdim.
Qandastarymyz úshin memlekettik qyzmetterdi, onyń ishinde JSN men turýǵa yqtiiarhat alýǵa, «qandas» mártebesin berýge, jeke kýálik jáne taǵy basqa qyzmetterdi jyldam alýǵa arnalǵan arnaiy jeke terezeler iske qosylǵanyn atap ótemin. Bul terezeler barlyq qyzmetterdi qas-qaǵym sátte, jedel alýǵa múmkindik beredi.
Ázirge bul qyzmet - Astana, Almaty, Oral, Aqtóbe qalalarynda qoljetimdi, biraq jaqyn arada elimizdiń basqa óńirlerinde de iske asyrýdy josparlap otyrmyz" - dep jazdy ol Facebook paraqshasynda.
