© Nobel Prize Youtube-arnasy
Biyl himiia salasy boiynsha Nobel syilyǵyn kvanttyq núktelerdi ashýǵa jáne sintezdeýge qatysqan úsh ǵalym ielendi. Olardyń qatarynda Amerika ǵalymdary Mýngi Bavendi men Lýis Briýs, sonymen qatar reseilik Aleksei Ekimov (1999 jyldan beri AQSh-ta, Nanocrystals Technology Inc kompaniiasynda jumys isteidi) bar, dep habarlaidy QazAqparat agenttigi VVS basylymyna silteme jasap.
Marapat «kishkentai ekeni sonsha, kólemin sipaty anyqtaityn kvanttyq núktelerdi ashqany jáne sintezi» úshin taǵaiyndaldy.
Laýreattardyń esimi Nobel komiteti resmi jariialaǵanǵa deiin birneshe saǵat buryn baspasóz betine shyǵyp ketti. Birqatar shvedtik BAQ Shvetsiia koroldik Ǵylym Akademiiasy qatelesip jibergen elektron hatty jariialady.
Sodan keiin kóp uzamai ǵylym akademiiasynyń ókilderi Reuters basylymyna himiia boiynsha biylǵy syilyq kimge tabystalatyny áli sheshilmegenin habarlady.
«Bul — Shvetsiia Koroldik ǵylym akademiiasynyń qateligi. Bizdiń jinalys Ortalyq Eýropa ýaqytymen 9:30–da (Grinvich boiynsha 7:30) bastalady, sheshim áli qabyldanǵan joq. Jeńimpazdar anyqtalmady», — dep málim etti Nobel komitetiniń himiia salasy boiynsha ókili Djoan Akvist.
Akademiia saitynda da baspasóz relizi bolǵan joq.
Jalpy, Nobel syilyǵy týraly aqparattyń erte tarap ketýi sirek kezdesedi. Syilyq taǵaiyndaityn túrli akademiia laýreattar esimi jariialanar sátke deiin qupiia saqtalýy úshin bar kúshin salady, al nominanttar tizimi jeńimpaz anyqtalǵannan keiin 50 jyl boiy jasyryn saqtalady.
Byltyr himiia salasy boiynsha Nobel syilyǵyn AQSh ǵalymdary Karolin Bertotstsi men Barri Sharpless, sonymen qatar daniialyq Morten Meldal alǵan bolatyn. Olar klik-himiia tásilin damytqany úshin marapattaldy.
Barri Sharpless syilyqqa ekinshi ret laiyq dep tanyldy. Ol 2011 jyly ǵalymdar Redzi Noeri men Ýiliam Noýlzben birge farmatsevtika óndirisindegi zertteýi úshin Nobel syilyǵyn ielengen bolatyn.
