«Áziret Sultan» memlekettik tarihi mádeni qoryq-murajaiynyń qory taǵy da bir tarihi, asa qundy jádigermen tolyqty.
Ol - bolattan jasalǵan qylysh. Qylyshtyń saqtalý jaǵdaiy ortasha. Súiekten jasalǵan tutqa-sabynyń tómengi bólikteri synǵan. Júzi azdap totyqqan. Júziniń bir jaǵy ǵana ótkirlengen. Qylyshtyń júzindegi kóptegen kertpe izderi onyń áskeri qaqtyǵystardy bastan keshirgendigin kórsetse kerek. Degenmen, qylyshtyń júzi áli de ótkirligin joimaǵan. Qaiqylanǵan pishindegi qylyshtardy qazaqta jataǵan qylysh dep te ataidy. Onyń ótkirlengen júzine qarsy betiniń jarty tútik pishindi bolyp kelýi, qylyshtyń áskeri áreketterde qarsylasty tek shabý úshin ǵana emes, túireý maqsatyna da arnalǵandyǵyn ańǵartyp tur. Júzi men sabynyń túiisken jeri jezben kómkerilgen.
Bul qylyshty biregei jádigerler qataryna jatqyzýǵa múmkindik beretin ózgeshe belgisi bar. Ol - qylysh sabynyń tómengi bóligindegi 1798 jyldan 1809 jylǵa deiin Qoqan handyǵynyń hany bolǵan Alim Han nemese Buhara ámirliginiń sońǵy bileýshisi Seid Mir Muhammed Alim hannyń aty jazylǵan jeke mór bederiniń túsirilýi bolyp otyr. Buǵan deiin handar ustaǵan, tutynǵan zattar qoryq-murajaida kezdespegen.
HIH ǵasyr men HH ǵasyrdyń basyndaǵy Qazaq tarihyna qatysty málimet kózi sanalatyn mundai jádigerler tarih aqtańdaqtaryn aiqyndaýǵa sep bolar tyń jańalyqtarǵa qol jetkizýge múmkindik berýi bek múmkin. Onyń ústine mundai belgili bir tarihi tulǵanyń esiminiń jádiger betinde kezdesýi jádigerdiń eksponat turǵysyndaǵy qundylyǵyn arttyra túsetini belgili.
Bolashaqta atalmysh jádigerge ǵalymdarymyz tiianaqty zertteý jumystaryn júrgizbek, dep habarlaidy "Áziret Sultan" qoryq-mýzeiiniń baspasóz qyzmeti.
