Birer kúnnen keiin kásipqoi bokstaǵy besinshi kezdesýine shyqqaly otyrǵan boksshy Jánibek Álimhanuly osy jekpe-jeginde de qazaqy boks stilin kórsetýge ýáde berdi, dep habarlaidy "Ult aqparat".
«Jánibek han - Qazaq handyǵynyń negizin qalaǵan handardyń biri. Eńseli el bolý jolyndaǵy Kerei men Jánibektiń eńbegi tarihta altyn árippen jazýly. Ult úshin ólsheýsiz eńbek etti. Bizge de azan shaqyryp han esimi qoiylǵan soń, álsiz bolýǵa qaqymyz joq. Babalardai uly is atqara almasaq ta, týdy qulatpai, namysty bermei, jeńispen eldi qýantý - negizgi mindetim dep esepteimin. Taqymqysar aǵaiynǵa myń alǵys. Muhittyń arǵy betinde jankúierlikterińizdi sezinip júrmin. Besinshi jekpe-jekke de az kún qaldy. Jeksenbide amerikalyqtarǵa Qazaqtyń boks stilin kórsetemiz, buiyrtsa. Jeńiste júzdeseiik. Tý jelbiresin!», - dep jazdy boksshy Instagram paraqshasynda.
Aita ketsek, buǵan deiin qazaqstandyq sportshy 2 aqpan kúni Amerikanyń Frisko qalasynda (Tehas, AQSh) Sergei Kovalev pen Eleider Alvares revanshynyń anderkardynda jekpe-jek ótkizetinin habarlaǵan bolatyn. BoxRec.com saitynyń málimetinshe, Jánibektiń besinshi jekpe-jegindegi qarsylasy - AQSh ókili, The Hitman (jaldamaly kisi óltirýshi) atalyp ketken boksshy Stiven Martines (18-4, 13 KO).
Eske sala keteiik, Jánibek Álimhanuly tórtinshi jekpe-jegin ótken jyldyń qarasha aiynda amerikalyq «Jyrtqysh» laqap atty Aleksandr Vonmen ótkizip, tóreshiler sheshimimen jeńiske jetken edi.
