Halyqtyń tabysyn arttyrýǵa 197 mlrd teńge jumsalady. Bul týraly búgin Úkimet otyrysynda QR Premer-Ministriniń orynbasary - Qarjy ministri Erulan Jamaýbaev aitty, dep habarlaidy QazAqparat.
Onyń atap ótýinshe, 2022 jylǵa arnalǵan respýblikalyq biýdjetti naqtylaý týraly zań jobasynda halyqtyń tabysyn arttyrýǵa baǵyttalǵan jalpy shyǵystar 197 mlrd teńgeni quraidy. Osy qarajat aiasynda jastardy qoldaý, óz biznesin ashý úshin mikrokreditter berý, jalǵa alynǵan turǵyn úi úshin tólemniń bir bóligin sýbsidiialaý jáne halyqtyń naqty tabysyn arttyrýǵa baǵyttalǵan basqa da mańyzdy is-sharalar qamtamasyz etiledi. Al azyq-túlik qaýipsizdigin qamtamasyz etý jospary aiasyndaǵy is-sharalarǵa 238 mlrd teńge jumsalady.
«Qosymsha qarajat agroónerkásiptik keshendi sýbsidiialaýǵa, kóktemgi egis jáne egin jinaý jumystaryna jeńildikpen kredit berý kólemin ulǵaitýǵa jáne aýyl sharýashylyǵyndaǵy basqa da máselelerdi sheshýge baǵyttalatyn bolady», - Erulan Jamaýbaev.
Sonymen qatar onyń aitýynsha, jalpy somasy 476 mlrd teńge bolatyn qosymsha shyǵystar óńirlerdi damytýǵa bólinedi.
«Atalǵan shyǵystardyń 271 mlrd teńgesi nemese 57 paiyzy batys jáne ońtústik óńirlerdi damytýǵa baǵyttalǵan. Jalpy alǵanda, naqtylaýdy eskere otyryp, óńirlerge respýblikalyq biýdjetten 5,5 trln teńgeden astam qarajat nemese jalpy shyǵystardyń 29,3 paiyzy baǵyttalatyn bolady. Sondai-aq, qosymsha qarajat aiasynda infliatsiia dáliziniń ózgerýine bailanysty áleýmettik tólemderdi indeksteýge arnalǵan shyǵystar kózdelgen. Bul 110 mlrd teńgeden asady», - Erulan Jamaýbaev.
Ministrdiń aitýynsha, osylaisha biýdjet túsimderi 15,8 trln teńgeni nemese jalpy ishki ónimge 17,3 paiyzdy quraidy. Shyǵystar 18,8 trln teńge nemese jalpy ishki ónimge 20,5 paiyz deńgeiinde boljanyp otyr.
«Biýdjet tapshylyǵy buryn bekitilgen deńgeide saqtaldy. Barlyq josparlanǵan sharalar ekonomika men óńirlerdiń damýyna serpin beredi, halyq tabysynyń ósýin qamtamasyz etýi jáne azamattardyń ómir súrý sapasyn jaqsartýy tiis», - dedi ol.
