Memleketimizdi baqýatty elge ainaldyryp, azamattardyń turmys sapasyn jaqsartý - ulttyq strategiiamyzdyń basty maqsaty. Bul týraly búgin Aqordada birqatar azamatqa memlekettik nagradalardy tapsyrý barysynda Memleket basshysy Qasym-Jomart Toqaev aitty, dep habarlaidy QazAqparat.
«Biz Táýelsizdik jyldarynda jalpy ulttyq birlik rýhyn kúsheittik. Tórtkúl dúniede bolyp jatqan ózgeristerge qarasaq, munyń asa mańyzdy ekenin jaqsy túsinemiz. Qazirgi tańda álem qoǵamdastyǵy sońǵy 50 jyldaǵy eń kúrdeli senim daǵdarysyn bastan ótkerýde. Bul - turaqtylyq pen yntymaqqa qaýip tóndiretin úrdis», - dedi Memleket basshysy.
QR Prezidenti azamattar men memleket institýttary arasyndaǵy qarama-qaishylyqtar da ýshyǵyp turǵandyǵyna basa nazar aýdartty.
«Kúlli álem jurtshylyǵy turmys sapasyn jaqsartýdy, teń múmkindikter berýdi jáne memlekettiń ashyqtyǵyn talap etýde. Qazaqstan – osy álemniń bir bóligi. Sondyqtan bul máselelerdiń bizdiń elimizge de qatysy bar. Osyndai jaǵdaida jalǵan urandarǵa sengen eldiń bereke-birlikten aiyrylǵanyna kýá bolyp otyrmyz. Sondyqtan jaǵymsyz áreketterge der kezinde nazar aýdaryp, halyqtyń múddesine sai saiasat júrgizý óte mańyzdy», - dedi Qazaqstan Prezidenti.
Qasym-Jomart Toqaev eń aldymen elimizdiń tuǵyry árqashan myqty bolýy kerektigin basa aitty.
«Al, bul halqymyzdyń tatýlyǵyna bailanysty. Birlik bar jerde tirlik bar. Memleketimizdi baqýatty elge ainaldyryp, azamattardyń turmys sapasyn jaqsartý – ulttyq strategiiamyzdyń basty maqsaty», - dedi Memleket basshysy.
.jpeg)