Halyqtyń barlyq zaimdar boiynsha negizgi qaryz somasyn tóleýin toqtata turý qajet. Bul týraly Aqordada Tótenshe jaǵdai jónindegi memlekettik komissiianyń otyrysyn ótkizgen QR Prezidenti Qasym-Jomart Toqaev aitty, dep habarlaidy "Ult aqparat".
«Birinshiden, tótenshe jaǵdai qoldanysy kezeńinde buǵan deiin qabyldanǵan aiyppuldar men ósimpuldardy esepteýge tyiymmen qatar halyqtyń barlyq zaimdary boiynsha negizgi qaryz ben syiaqy somasyn tóleýin toqtata turý qajet. Bankterden tolyq túsinistik pen azamattyq yntymaqtastyq kútemin», - dedi Memleket basshysy.
QR Prezidentiniń paiymynsha, kóptegen azamattar jeke qarjylyq jaǵdaiynyń qiyndaýyna bailanysty banktik emes uiymdarǵa, lombardtarǵa, onlain kreditorlarǵa, mikroqarjylyq uiymdarǵa kepilsiz nesie alý úshin júginetin bolady.
«Azamattardy aldaýǵa jol berýge bolmaidy. Qarjy naryǵyn retteý jáne damytý agenttigine, Bas prokýratýraǵa, Aqparat jáne qoǵamdyq damý ministrligine zańnamanyń saqtalýyn tekserý boiynsha aýqymdy aktsiia júrgizýge jáne zań buzýshylardy jariia túrde jazalap, muny BAQ pen áleýmettik jelilerde barynsha kórsetýdi tapsyramyn. Bul qazaqstandyqtar qiyn-qystaý jaǵdaida ózderiniń quqyqtaryn memleket qatań qorǵaityndyǵyn bilý úshin qajet», - dedi Qasym-Jomart Toqaev.
