Jyl sońyna deiin Qazaqstan halqynyń 99,3% keńjolaqty internet qoljetimdi aýmaqta turady. Bul týraly QR Tsifrlyq damý, innovatsiialar jáne aeroǵarysh ónerkásibi ministrligi telekommýnikatsiialar komitetiniń tóraǵasy Vitalii Iaroshenko málimdedi, dep habarlaidy QazAqparat.
«Jyl basynda uialy bailanys operatorlary men bizdiń ministrlik arasynda memorandýmǵa qol qoiyldy. Oǵan sáikes uialy bailanys operatorlary jobany aiaqtaýǵa jáne 250-den astam adam turatyn barlyq aýyldardy 3G jáne/nemese 4G qyzmetterimen qamtamasyz etýge mindetteldi. Atalǵan joba boiynsha ázirge 46 aýyl qamtyldy, 882 eldimeken jyl sońyna deiin qamtamasyz etiledi», - dedi spiker Ortalyq kommýnikatsiialar ortalyǵynda ótken baspasóz máslihatynda.
Onyń aitýynsha, jyl sońyna qarai Qazaqstan halqynyń 99,3% keńjolaqty internet qoljetimdi aýmaqta turady.
«Odan bólek, 250-den az adam turatyn aýyldardy qaitemiz degen másele qaraldy. Bizdiń vedomstvo Ulttyq ekonomika ministrligimen jáne ákimdiktermen birlesip taldaý júrgizdi. Qazirgi ýaqytta 243 eldimeken iriktelip alyndy, onda da keńjolaqty Internet jelisi salynady. Jańa oqý jylyna daiyndyq boiynsha da jumys júrgizdik. Internetpen problemasy bar mektepter jáne internetpen qamtylmaǵan aýyldardaǵy oqýshylar qalypty rejimde oqidy», - dedi V. Iaroshenko.
