Qazaqstan Respýblikasy Parlamenti Májilisiniń depýtaty Gúlnar Bijanova internet nemese telefon qońyraýy arqyly jasalǵan alaiaqtyqqa tosqaýyl qoiý máselesin kóterdi, dep habarlaidy QazAqparat.
«Zań jobasynyń tanystyrylymynan , ókinishke qarai, tutynýshylardyń quqyǵy buzylatyn eki mańyzdy máseleni kóre almadym. Bul - internettegi saýda jáne internet arqyly jasalatyn alaiaqtyq. Bul sondai-aq jypyrlap shyǵa beretin jarnama, uialy bailanys operatorlarynyń derbes derekterine qol jetkizý, jumys ýaqytynda túsiniksiz distribiýtorlardyń ártúrli utys utyp alǵanyńyzdy aityp, bas qatyratyn sheksiz qońyraýlar máselesi qamtylmapty», - dedi Májilis depýtaty Saýda jáne integratsiia vitse-ministri Qairat Tórebaevqa qarata.
Onyń aitýynsha, alaiaqtyqtyń bul túrinen zardap shegip jatqan adamdar tym kóp.
«Eń bastysy, ár sózge senip qalatyn zeinetkerlerimiz jii zardap shegip jatyr. Adamdar milliondar ainalymyna aqsha aýdarady. Siz sondai-aq óz baiandamańyzda barlyq satyda sottyq retteý qoljetimdi bolatynyn aityp qaldyńyz. Alaida mundai jaǵdaida sheteldegilerge aldanyp qalyp jatqandar da bar. Zań jobasy bul máseleni qalai retteidi?» - dep surady G. Bijanova.
Bul suraqqa jaýap bergen Qairat Tórebaev tutynýshylar quqyǵyn qorǵaý júiesi halyqtyń barlyq sanatyn qamtitynyna sendirdi.
«Internettegi saýda - óte kúrdeli qubylys. Biz halyqaralyq tájiribeni arnaiy zerttep kórdik. Biraq ókinishke qarai basqa elderde de, Qazaqstanda da ortaq amal-ádis qalyptasqan joq. Áitse de aitqanymdai bizde aqparattyq júie bolady. Barlyq shaǵymdy soǵan tirkeimiz. Eger júielik problemalar bolsa, biz mundai saittardy buǵattaý nemese olardyń quqyǵyn buzatyn satýshylarmen bailanys ornatý máselesin kóteremiz», - dedi vitse-ministr.
Qairat Tórebaev Qazaqstan óz kezeginde ózge elderdiń zańnamasyna yqpal ete almaitynyn jetkizdi.
«Iaǵni eger satýshy Reseide, al satyp alýshy Qazaqstanda bolsa, onda máseleni halyqaralyq yntymaqtastyq arqyly sheshý kerek. Biz óz biznesiniń sýbektileri úshin jaýap beretin shet memlekettiń bilik organdarymen kelissóz júrgizetin bolamyz. Bul - óte kúrdeli másele», - dep túidi vitse-ministr.
