© Photo : Pixabay / drfuenteshernandez
Indýstriia jáne infraqurylymdyq damý ministri Qaiyrbek Óskenbaev "bir aýdan – bir kásiporyn" qaǵidaty boiynsha sý arnalaryn irilendirýdi usyndy, dep habarlaidy Sputnik Qazaqstan.
Ministrdiń aitýynsha, salynǵan sý qubyry jelileri ákimdik balansynda qalady nemese bilikti mamandary men arnaiy tehnikasy joq kásiporyndarǵa berilip jatady. Al bul sý qubyrlarynyń tez arada tozýyna ákep soǵady jáne qaita qalpyna keltirý úshin qosymsha shyǵyndy talap etedi.
"Osyǵan bailanysty sý jelilerine tiisti qyzmet kórsetý úshin "bir aýdan – bir kásiporyn" qaǵidaty boiynsha sý arnalaryn irilendirý usynylady. Bul shara kórsetiletin qyzmet sapasyn jáne jumys tiimdiligin arttyrýǵa múmkindik beredi", - dedi Óskenbaev úkimet otyrysynda.
Ákimdikter jergilikti biýdjet qarajaty esebinen jarǵylyq kapitalyn ulǵaitý arqyly sý arnalarynyń materialdyq-tehnikalyq bazasyn jaqsartý jóninde sharalar qabyldaýy qajet. 2021 jyl qorytyndysy boiynsha sýmen jabdyqtaý qyzmetterimen qamtý 96%-ti, onyń ishinde qalalarda – 98,1%, aýyldarda – 93%.
Aýyldardy aýyz sýmen qamtýdyń eń tómengi deńgeii Qostanai (74,9%) jáne Soltústik Qazaqstan oblystarynda (83,5%) tirkelip otyr. Al qalalarda sýmen jabdyqtaý qyzmetterimen qamtamasyz etý boiynsha Jambyl oblysy artta qalǵan (91%). Sýmen jabdyqtaý qyzmetterimen Soltústik Qazaqstan, Mańǵystaý, Atyraý jáne Qyzylorda oblystarynyń qala turǵyndary 100% qamtylǵan.
Aýyldardy atalǵan qyzmetpen qamtamasyz etý boiynsha kóshbasshylar qatarynda Almaty (99,1%), Atyraý (99%), Qyzylorda (97,8%) jáne Mańǵystaý (96,2%) oblystary tur.
Óskenbaev kósh sońynda qalǵan óńirlerge basym negizde qarajat bólinetinin atap ótti. Ministr biyl bul maqsattarǵa respýblikalyq biýdjetten 215 milliard teńge kózdelgenin málimdedi. Onyń ishinde qalalarǵa – 120 milliard teńge jáne aýyldarǵa 95 mlrd teńge. Nátijesinde jyl sońynda qala halqynyń 98,5 paiyzy, al aýyl halqynyń 94,7 protsenti sýmen jabdyqtaý qyzmetterimen qamtylady.
Qazaqstanda barlyǵy 6 302 aýyldyq eldi meken bar, onyń ishinde 4 759-y sýmen jabdyqtaý qyzmetterimen qamtylǵan: 4 128 aýyl ortalyqtandyrylǵan sý júiesimen jabdyqtalsa, 631 aýylda keshendi blok-modýlderi ornatylǵan.
Óskenbaev Prezidenttiń halyqty bes jyl ishinde aýyz sýmen qamtý týraly tapsyrmasy kezeń-kezeńmen 2025 jylǵa deiin oryndalatynyna sendirdi.
