QR Prezidenti Nursultan Nazarbaev "Nur Otan" partiiasy arqyly áleýmettik mańyzy bar máselelerdi bárin baqylaýdy tapsyrdy, dep habarlaidy QazAqparat tilshisi.
"Partiia halyqtyń kúndelikti máselelerin sheshýge belsene atsalysýy qajet. Atalǵan jumys "Halyqqa kómek" jobasyn da kúsheitedi degen senim bar. Búginde qoǵamnyń ózekti máselelerin der kezinde anyqtap, memlekettik organdardy soǵan qarai jumyldyrý qajet. Bul - naǵyz nátijeli strategiia. Ol úshin halyqpen keri bailanystyń myqty júiesin jasap shyqqan jón", - dedi N.Nazarbaev "Nur Otan" partiiasynyń XVIII sezinde.
Prezidenttiń aitýynsha, búginde "Nur Otan" partiiasynyń qabyldaý bólimshelerin barynsha kúsheitý kerek. Atalǵan qurylymdar halyqqa kómek berýdiń "biryńǵai terezesine" ainalýy shart. "Bul jerde biýrokratiiaǵa jol joq. "Nur Otan" partiiasynyń barlyq filialdary soǵan kúsh salýy qajet. Partiia halyqtyń barlyq sanattaryn qorǵai bilýi kerek. Sóitip, memleket pen halyq arasyndaǵy kópir ispettes bolýy shart", - dep atap kórsetti N.Nazarbaev.
Memleket basshysy memlekettik baǵdarlamalardyń tiimdiligin baqylap otyrý máselesine de basa nazar aýdardy. Sebebi atalǵan bastamalardyń barlyǵy sátti iske assa, halyqtyń ál-aýqaty kóteriledi.
Aita keteiik, búgin Memleket basshysy Nursultan Nazarbaev kópbalaly otbasylarda árbir balanyń tólemaqysyn 21 myń teńgege deiin arttyrýdy tapsyrdy. Budan bólek, múgedek balalardy asyrap otyrǵan otbasylardyń járdemaqysy 30 protsentke ósedi.
