قر پرەزيدەنتٸ نۇرسۇلتان نازارباەۆ "نۇر وتان" پارتيياسى ارقىلى ەلەۋمەتتٸك ماڭىزى بار مەسەلەلەردٸ بەرٸن باقىلاۋدى تاپسىردى, دەپ حابارلايدى قازاقپارات تٸلشٸسٸ.
"پارتييا حالىقتىڭ كٷندەلٸكتٸ مەسەلەلەرٸن شەشۋگە بەلسەنە اتسالىسۋى قاجەت. اتالعان جۇمىس "حالىققا كٶمەك" جوباسىن دا كٷشەيتەدٸ دەگەن سەنٸم بار. بٷگٸندە قوعامنىڭ ٶزەكتٸ مەسەلەلەرٸن دەر كەزٸندە انىقتاپ, مەملەكەتتٸك ورگانداردى سوعان قاراي جۇمىلدىرۋ قاجەت. بۇل - ناعىز نەتيجەلٸ ستراتەگييا. ول ٷشٸن حالىقپەن كەرٸ بايلانىستىڭ مىقتى جٷيەسٸن جاساپ شىققان جٶن", - دەدٸ ن.نازارباەۆ "نۇر وتان" پارتيياسىنىڭ XVIII سەزٸندە.
پرەزيدەنتتٸڭ ايتۋىنشا, بٷگٸندە "نۇر وتان" پارتيياسىنىڭ قابىلداۋ بٶلٸمشەلەرٸن بارىنشا كٷشەيتۋ كەرەك. اتالعان قۇرىلىمدار حالىققا كٶمەك بەرۋدٸڭ "بٸرىڭعاي تەرەزەسٸنە" اينالۋى شارت. "بۇل جەردە بيۋروكراتيياعا جول جوق. "نۇر وتان" پارتيياسىنىڭ بارلىق فيليالدارى سوعان كٷش سالۋى قاجەت. پارتييا حالىقتىڭ بارلىق ساناتتارىن قورعاي بٸلۋٸ كەرەك. سٶيتٸپ, مەملەكەت پەن حالىق اراسىنداعى كٶپٸر ٸسپەتتەس بولۋى شارت", - دەپ اتاپ كٶرسەتتٸ ن.نازارباەۆ.
مەملەكەت باسشىسى مەملەكەتتٸك باعدارلامالاردىڭ تيٸمدٸلٸگٸن باقىلاپ وتىرۋ مەسەلەسٸنە دە باسا نازار اۋداردى. سەبەبٸ اتالعان باستامالاردىڭ بارلىعى سەتتٸ ٸسكە اسسا, حالىقتىڭ ەل-اۋقاتى كٶتەرٸلەدٸ.
ايتا كەتەيٸك, بٷگٸن مەملەكەت باسشىسى نۇرسۇلتان نازارباەۆ كٶپبالالى وتباسىلاردا ەربٸر بالانىڭ تٶلەماقىسىن 21 مىڭ تەڭگەگە دەيٸن ارتتىرۋدى تاپسىردى. بۇدان بٶلەك, مٷگەدەك بالالاردى اسىراپ وتىرعان وتباسىلاردىڭ جەردەماقىسى 30 پروتسەنتكە ٶسەدٸ.
